Nuk kaloi shumë kohë dhe babai i Meghan Markle u shfaq sërish. Në dokumentarin “Thomas Markle: My Story”, të transmetuar në Channel 5 dje, ai foli për dështimin e marrëdhënies së tij me Meghan Markle. Në një tjetër rmoment, pranoi se gënjeu në një intervistë të mëparshme.

Markle sqaroi se në një intervistë të dhënë në qershor të 2018-s në “Good Morning Britain” me Piers Morgan, gënjeu kur tha se Meghan dhe Harry e ftuan në dasmë. “Në të vërtetë, te Piers unë gënjeva,” shpjegoi ai. “E bëra që të mos prishja imazhin e tyre”.

Sikur të mos mjaftonte kjo, Thomas Markle shtoi se do të vazhdojë të japë intervista, për të cilat duhet të paguhet. Përpos kësaj, ai pretendoi se duhet të paguhet edhe nga Meghan-i.

“Unë do të bëj gjëra në të ardhmen për të cilat duhet të paguhem, mendoj. Nuk më intereson. Në këtë pikë, më kanë shumë borxhe. Mbretërorët më detyrohen. Harry më detyrohet. Meghan më detyrohet. Ajo që kam kaluar duhet të shpërblehet.”

Në një tjetër moment, Thomas tha:

“Vajza ime më tha që kur të shkoja në moshë të vjetër, do të kujdesej për mua. Unë jam 75 vjeç dhe është koha që ajo të kujdeset për të atin.”

Në vijim, ai shtoi se “i mungon Meghan-i”. “Më mungon ajo që ishte më parë. Tani nuk e di kush është, ky është problemi.”

Hmm...logjika na thotë se ky dokumentari nuk është forma më e mirë për t’u ribashkuar babë-e-bijë, por mbetet për t’u parë. Deri tani, pritet që të takohen në gjykatë, ku do të dëshmojnë kundër njëri-tjetrit.