Kryebashkiakja e Amsterdamit ka kërkuar mbështetje politike për të pakësuar popullimin e distriktit të dritave të kuqe pasi zbuloi se një e treta e turistëve të huaj dhe gjysma e britanikëve s’do ta vizitonin më qytetin nëse s’do të blinin dot kanabis.
Femke Halsema, e cila la të kuptohet se do të pakësojë numrin e shitësve të kanabisit, u prezantoi këshilltarëve rezultatet e një sondazhi me shpresën për të gjetur një zgjidhje për turistët që e vizitojnë qytetin thjesht për t’u droguar.
Numri i lartë i turistëve përbën problem për Amsterdamin pasi mbipopullon rrugët dhe bllokon atraksionet turistike. Qyteti ka 1.1 milionë banorë dhe mirëpret më shumë se 17 milionë vizitorë çdo vit. Qyteti është mëse i vendosur t’i bëjë vizitorët të mos i shfrytëzojnë politikat tolerante ndaj kanabisit.
Sondazhi i realizuar nga zyra e statistikave, kërkimit dhe informacionit zbuloi se 34% e atyre që vizitojnë zonën Singel, ku ndodhet distrikti i dritave të kuqe, do të shkonin më rrallë në qytet nëse të huajit s’do të blinin dot kanabis. 11% thanë se s’do të ktheheshin kurrë në Amsterdam.
