Pavarësisht se tashmë televizioni italian është një dritare e re në karrierën e Alketa Vejsiut, ajo “i përket këtij vendi dhe do t’i përkasë gjithmonë”. Në një intervistë në Ilva Now në studion e Euronews me Ilva Taren, Alketa u shpreh se “nuk ka kufi përsa i përket mënyrës si e sheh punën”.

“Jam njeri shumë në lëvizje, udhëtoj gjithë kohën,” shtoi moderatorja duke lënë të hapur mundësinë e një bashkëpunimi me televizionet italiane. “Kështu që nuk më duket e vështirë që të marrësh avionin 50 minuta, të shkosh në Romë e të vish. Është praktikisht jeta që bëj për shkak të biznesit, i cili është një biznes që më ka lidhur me gjithë botën.”

Ndër të tjera, ajo tregoi në Ilva Now se së shpejti do të ketë të ftuar në “Në kurthin e Piter Pan” një nga idhujt e saj, Ambra Angiolini, e cila e vlerësoi përmes komenteve fill pas prezantimit të Vejsiut në Sanremo.

Në një intervistë për “E Diell”, asokohe drejtuar nga Adi Krasta, përsa i përket bashkëpunimeve ndërkombëtare, Alketa u shpreh:

“Mendoj që Shqipëria është një tavan, nuk është një qiell i pafundëm," tha ajo. "Mendoj që mund të kisha bërë diçka shumë më të mirë në një treg më të madh sesa Shqipëria. Italia do të kishte qenë një orientim shumë i mirë për mua, sepse më duket shumë afër Shqipërisë. Nuk e di pse Shqipëria dhe Italia më duken si një gjë e madhe e përbashkët kohëve të fundit. Kam patur si frymëzim dhe si pikë të mirë orientimi kohëve të fundit zhvillimet e Fascino-s, shoqëria e Maria De Filippi-t, një grua absolutisht e suksesshme me një intuitë fantastike për të zgjedhur ato që duhet[...] De Filippi dhe skuadra e saj janë një pikë e mirë orientimi për mua."