Artikull i përditësuar (30 qershor, ora 16:11)
Përmes një njoftimi në Facebook, ministrja e Shëndetësisë dhe Mbrojtjes Sociale, Ogerta Manastirliu, konfirmoi se mjeku Arjan Pushi ndërroi jetë.
"Ndarja nga jeta e Profesor Arjan Pushit është një dhimbje e madhe për familjen, për miqtë e tij, për kolegët, pedagogët e Universitetit të Mjekësisë ku ka shërbyer për shumë vite.
Kontributi i çmuar i Profesor Arjan Pushit për mjekësinë shqiptare, do të mbetet i pashlyeshëm ndër breza.
Megjithë përpjekjet e kolegëve, të cilët bënë të pamundurën për ta mbajtur në jetë në spitalin infektiv, prof. Arjani nuk ia doli dot, në betejën me virusin e rrezikshëm.
U prehsh në paqe Profesor Pushi!
Ngushëllime të sinqerta familjes dhe miqve. Ju jemi pranë në këto momente të vështira!"
Artikull i përditësuar (29 qershor, ora 18:51)
Ministria e Shëndetësisë ka reaguar ndaj lajmit të ndarjes nga jeta të mjekut të parë si pasojë e Covid-19. Sipas Abc News, MSH bën me dije se mjeku Arjan Pushi nuk ka ndërruar jetë dhe se ky lajm është i pavërtetë. Lajmin për "ndarjen nga jeta" e bëri publik një prej kolegëve të tij përmes Facebook, ku bashkangjitur fotos së mjekut hematolog, "ngushëllon" familjarët.
Artikulli i mëparshëm (29 qershor, ora 16:45)
Mjeku i njohur hematolog, Arjan Pushi ka ndërruar jetë si pasojë e Covid-19. Pushi, është viktima e parë mes bluzeve të bardha të prekur nga koronavirusi që nuk ja doli të mbijetojë. Sipas Abc News, mjeku ishte i shtruar prej ditësh në spitalin Infektiv në gjendje të rëndë. Nuk dihet ende nëse mjeku ka patur ndonjë sëmundje shoqëruese që ka përkeqësuar edhe më gjendjen.
Lajmin e ka bërë publik një prej kolegëve të tij përmes një statusi, ku ka shprehur ngushëllimet familjarëve.
“U dorëzua një mjeshtër i punës që ndër vite dha një kontribut madho në shërbimin e hematologjisë në vendin tonë dhe mbarë trevat tona ku ka shqiptarë.
Dhe edukoi profesionalisht breza mjekësh ndër vite në vendin tonë! Shpirti i tij u prehtë në paqe! Dhe ngushëllime familjarëve!”- shkruan ai përmes një statusi në Facebook.
Situata e Covid-19 në vend mbetet problematike pas numrit të përditshëm të shtuar të rasteve pozitive dhe viktimave.
