Albumi i ardhshëm, “R9”, është pothuajse gati dhe Rihanna u premtoi fansave se ia ka vlejtur pritja. Në një intervistë për Access Online, këngëtarja shpjegoi pse ka qëndruar kaq gjatë larg muzikës.
“Mezi po pres që të publikoj diçka për të cilën jam vërtet krenare dhe e lumtur. Me siguri që do të jetë shumë më shpejt nga sa mendojnë fansat e mi, por nuk dua të jap më shumë detaje sepse kam mjaftueshëm stres dhe pyetje për ‘R9’.”
Rihanna shpjegoi se e njëjta gjë ndodhi edhe përpara publikimit të albumit “Anti” në vitin 2016.
“E mbaj mend mirë ditën kur nisa punën për ‘Anti’. Ishte dita ime e parë në studio, pra ishte ende herët. Një paparac më kapi duke hyrë në studio dhe pas kësaj, fansat e mi prisnin me padurim publikimin. Në të kaluarën, unë e kam bërë një album për tre muaj, por tani nuk e kam luksin të bëj një gjë të tillë sepse kam edhe ‘fëmijë’ të tjerë.” – tha ajo duke iu referuar kompanisë së saj, Fenty.
Riri foli edhe për Entertainment Tonight dhe zbuloi se për albumin e ri ia ka vlejtur pritja.
“Unë gjithmonë jam duke u marrë me muzikë. Gjithnjë kam punuar për muzikën. Kur të jem gati, do t’i publikoj [këngët]. Nuk do të zhgënjeheni. Nuk mund ta nxjerr albumin thjesht sepse njerëzit e presin. Zgjati kaq shumë, do sigurohem që t’ia vlejë.”
Rihanna publikoi “Anti” në 2016 dhe që prej asaj kohe, është marrë me ndërtimin dhe risitë e kompanisë (modë dhe produkte kozmetike), Fenty, të cilin e themeloi në vitin 2017. Përsa i përket albumeve, ajo ka publikuar edhe "Music of the Sun" (2005), "A Girl like Me" (2006), "Good Girl Gone Bad" (2007), "Rated R" (2009), "Loud" (2010), "Talk That Talk" (2011), "Unapologetic" (2012).
