Luana Vjollca do të rikthehet së shpejti në ekran me sezonin e katërt të “Shiko kush luan”, ndërkohë që ndër pyetjet më të zakonshme në Instagramin e saj lidhet me “Take me out”, programin për të cilin moderatorja po përgatitej para pandemisë, i cili u ndërpre për shkak të koronavirusit.
Përmes një postimi në Instagram Stories, Luana shprehet se “Take me out” do të transmetohet vitin e ardhshëm, në sezonin e ri televiziv. Ajo nuk përmendi ndonjë datë specifike.
Sipas formatit origjinal, i transmetuar në Australi në vitin 2009, një burrë i vetëm vihet përballë 30 grave konkurrente që qëndrojnë në një podium të ndriçuar. Loja ndahet në tre segmente. Duke gjykuar vetëm nga pamja e burrit dhe nga një rresht informacion për të, gratë duhet të vendosin në duan ta mbajnë ndezur dritën apo duan ta fikin. Nëse e fikin, pra shprehin mospëlqim, nuk mund ta ndezin më. Në fazën tjetër, tregohet një video e beqarit që flet për cilësitë, aftësitë dhe parimet e tij.
Sërish, gratë zgjedhin ta mbajnë dritën ndezur apo ta fikin. Tregohet një video tjetër e një familjari a miku të beqarit që flet për të. Gratë vendosin sërish. Nëse në fund të këtij procesi kanë mbetur më shumë se katër drita ndezur, beqari fik një prej tyre. Më pas, tre grave të mbetura u bën një pyetje. Fik dritën e njërës. Pastaj u bën një pyetje dy grave të mbetura dhe fik dritën e njërës duke mbetur kështu me një partnere. Nëse gjatë lojës fiken të gjitha dritat, beqari largohet pa një takim.
Në versionin britanik, beqari vjen në skenë me ashensor, takon vajzat, prezantohet dhe thotë nga është. Në vend të videos së dytë, beqari britanik performon një talent në skenë ose lejon dikë t’i nxjerrë një sekret. Gjithashtu, kur hyn në skenë, beqari përzgjedh një vajzë si “dashuri me shikim të parë,” por identiteti i saj mund ose mund të mos zbulohet në fund të puntatës.
Versioni kinez, që është jashtëzakonisht i suksesshëm, i jep mundësinë grave konkurrente të ndezin një dritë edhe më të fortë, që i bën menjëherë finaliste për të fituar një takim me beqarin.
Në një sondazh të Anabel.al në fillim të marsit, një pjesë e mirë e njerëzve u shpreh se “Take me out” do të jetë Big Brother-i i ri për nga audienca.
