Nesër (14 shtator) nis sezoni i ri shkollor. Rreth 480 mijë nxënës dhe 30 mijë mësues rikthehen në bangat e shkollës, por këtë vit nën rregullat e normalitetit të ri.
Shumica e shkollave, për të bërë të mundur ruajtjen e distancës do ta zhvillojnë mësimin në 2 turne, ndërsa një pjesë tjetër me 4 turne. Vendime të tilla, sigurisht që shoqërohen me vështirësi dhe hera-herës me pakënaqësi nga të gjitha palët.
Rreth 1 mijë mësues janë në dispozicion për të bërë zëvendësime në rast nevoje, e ndërsa prindërit duhet të deklarojnë rreth gjendjes shëndetësore të fëmijës duke plotësuar një formular.
“Është edhe një informacion qe vjen nga familja që ky fëmijë është i shëndetëshëm. Çdo shkollë tashmë ka caktuar një koordinator që do të jetë në rolin e informatorit."- shprehen specialistë të Institutit të Shëndetit Publik.
Në rast se fëmija paraqet temperaturë apo shenja të ngjashme me ato të Covid-19, prindi duhet të njoftojë menjëherë mjekun e familjes dhe të mos e dërgojë në shkollë. Eshtë mjeku ai që do ta vlerësojë nëse bëhet fjalë për virozë stine apo koronavirus.
Maskat, distanca dhe higjena janë një sfidë e shtuar për nxënësit dhe stafin arsimor, prandaj mbetet për t'u parë se si do të menaxhohet mësimdhënia në të tilla kushte.
Sipas mjekut epidemiolog, Pëllumb Piperos identifikimi i një rasti me Covid-19 në ambientet e shkollës, nuk do të thotë domosdoshmërisht që duhet të merren masa ekstreme deri në mbylljen e saj.
Për të kujtuar edhe njëherë rregullat dhe sjelljen e re këtë vit shkollor, lexoni artikujt më poshtë.
- Formulari që nxënësit duhet të kenë çdo ditë me vete
- Sipas Pëllumb Piperos: Si duhet vepruar në rast se ka një të infektuar me Covid-19 në shkolla
- Fëmijët i kthehen mësimit: Ja ku mund të bëhen gati për shkollë fare lehtë
- Në prag të sezonit shkollor: Rekomandimet e Ministrisë së Shëndetësisë
- 10 këshilla për ata që kthehen në shkolla gjatë Covid-19: Ç’duhet të keni parasysh
Burimi: Abc News
