Problemet dentare bëhen gjithnjë e më serioze kur neglizhohen. Të prisni derisa dhimbja të bëhet e padurueshme mund ta kthejë një shqetësim të lehtë në një trajtim shumë më të ndërlikuar.
Ndjeshmëria që vazhdon, gjakosja e mishrave apo një zonë e ashpër në gjuhë mund të sinjalizojnë probleme të ndryshme. Jo çdo simptomë është alarmante, por këto 20 shenja tregojnë se nuk duhet të prisni që problemi të zhduket vetë.
1. Dhimbja e dhëmbit nuk largohet
Një shqetësim pasi keni kafshuar diçka të fortë mund të qetësohet vetë, por dhimbja që vazhdon më shumë se një ose dy ditë duhet kontrolluar. Shkaku mund të jetë prishja e dhëmbit, një krisje, acarimi i nervit ose një infeksion pranë rrënjës. Asnjë prej tyre nuk duhet trajtuar vetë në shtëpi.
2. Ju është ënjtur fytyra ose nofulla
Ënjtja e dukshme rreth faqes ose mishrave mund të lidhet me një infeksion, mund të shoqërohet edhe me nxehtësi në zonën e prekur, ndjeshmëri, temperaturë ose shije të keqe në gojë.
3. Mishrat ju gjakosen rregullisht
Mund të ketë pak gjakosje pas përdorimit të fillit dentar, sidomos nëse nuk e keni përdorur prej muajsh. Por gjakosja e shpeshtë nuk duhet të konsiderohet normale.
Mishrat e skuqur, të fryrë dhe që gjakosen gjatë larjes mund të jenë shenjë e hershme e gingivitit ose e një sëmundjeje më të avancuar të mishrave. Dentisti mund të përcaktojë nëse ju nevojitet pastrim profesional ose ekzaminim më i thelluar.
4. Ushqimet e nxehta dhe të ftohta ju shkaktojnë dhimbje
Një pickim nga akullorja zakonisht lidhet me ndjeshmërinë e zakonshme, por një dhimbje e re, e fortë ose që vazhdon për një kohë të gjatë mund të tregojë dëmtim të smaltit, inflamacion të nervit të dhëmbit etj.
5. Një dhëmb lëviz
Dhëmbët nuk duhet të lëvizin, pavarësisht moshës. Lëvizja mund të shkaktohet nga sëmundjet e mishrave, humbja e kockës, një dëmtim ose presioni nga kërcitja dhe shtrëngimi i dhëmbëve.
6. Era e keqe e gojës vazhdon edhe pas larjes
Ushqimet si hudhra mund të lënë erë përkohësisht, por aroma e pakëndshme nuk duhet të vazhdojë pasi keni larë dhëmbët dhe gjuhën. Era e vazhdueshme mund të lidhet me sëmundjen e mishrave, mbetje ushqimore, tharjen e gojës, infeksionin e një dhëmbi ose një pajisje dentare që nuk përshtatet siç duhet.
7. Shihni një vrimë ose njollë të errët
Një shenjë kafe ose e bardhë si shkumës në dhëmb mund të jetë zonë e prishur dhe jo thjesht njollë. Disa kavitete nuk shkaktojnë dhimbje derisa arrijnë në shtresat më të thella të dhëmbit. Pamja mund të jetë paralajmërimi i parë, ndaj kontrolli duhet bërë përpara se dëmtimi të përparojë.
8. Mishrat po tërhiqen
Dhëmbët mund të duken më të gjatë kur indi i mishrave fillon të tërhiqet. Shkaqet kryesore përfshijnë sëmundjen e mishrave, larjen agresive, përdorimin e duhanit, kërcitjen e dhëmbëve ose mishrat natyralisht të hollë. Dentisti mund të ndihmojë në mbrojtjen e rrënjëve të ekspozuara nga ndjeshmëria dhe prishja.
9. Një plagë në gojë nuk po shërohet
Plagët e vogla të krijuara nga kafshimi aksidental i faqes zakonisht përmirësohen brenda një ose dy javësh. Një plagë apo njollë e kuqe ose e bardhë duhet kontrolluar, veçanërisht kur vazhdon për më shumë se dy javë.
10. Përtypja është bërë e dhimbshme
Dhimbja gjatë kafshimit mund të shkaktohet nga një dhëmb i krisur, mbushje e liruar, infeksion i rrënjës, inflamacion rreth dhëmbit etj. Tregojini dentistit nëse dhimbja shfaqet kur kafshoni apo kur e lironi kafshimin, sepse ky detaj mund të ndihmojë në përcaktimin e shkakut.
11. Zgjoheni me dhimbje në nofull
Dhimbja e nofullës në mëngjes, dhimbjet e kokës ose muskujt e lodhur mund të tregojnë se i shtrëngoni dhëmbët gjatë natës.
Me kalimin e kohës, presioni mund të rrafshojë sipërfaqet e dhëmbëve, të krijojë krisje të vogla dhe të dëmtojë kurorat apo mbushjet. Dentisti mund t’ju rekomandojë një mbrojtëse për dhëmbët.
12. Ju ka rënë një mbushje ose kurorë
Humbja e një mbushjeje apo kurore nuk është vetëm bezdi, sepse dhëmbi poshtë saj mbetet i ekspozuar dhe i pambrojtur. Ushqimi dhe bakteret mund të futen në zonën e hapur, ndërsa përtypja mund të shkaktojë dëmtime ose ndjeshmëri të mëtejshme. Ruajeni kurorën, nëse është e mundur, dhe kontaktoni dentistin në vend që të provoni ta rregulloni vetë.
13. Vëreni qelb
Një kokërr e vogël në mishra, e ngjashme me puçërr, mund të jetë pika nga ku kullon një infeksion pranë rrënjës së dhëmbit. Mos e shponi apo prekni, sidomos nëse nxjerr lëng ose shkakton shije të pakëndshme. Edhe kur dhimbja është e lehtë, kërkohet trajtim i shpejtë.
14. Dhëmbët po ciflosen më shpesh
Copëzat që thyhen vazhdimisht mund të tregojnë smalt të dobësuar. Mund të lidhen edhe me karies të patrajtuar, kërcitjen e dhëmbëve ose erozionin nga acidet. Dentisti mund të riparojë dëmtimin dhe të hetojë arsyen pse po ndodh.
15. Goja është vazhdimisht e thatë
Tharja e gojës mund të shkaktohet nga dehidratimi, efektet anësore të ilaçeve, përdorimi i duhanit ose prodhimi i ulët i pështymës. Një kontroll dentar mund të identifikojë shenjat e tharjes dhe t’ju ndihmojë të gjeni mënyra praktike për ta menaxhuar.
16. Protezat kanë filluar t’ju shkaktojnë dhimbje
Protezat që dikur ishin të rehatshme mund të bëhen të lirshme ose të dhimbshme, sepse mishrat ndryshojnë me kalimin e kohës. Klikimet, rrëshqitja, plagët nga presioni ose vështirësia në përtypje tregojnë se përshtatja duhet rivlerësuar. Mos vazhdoni t’i rregulloni vetëm me ngjitës të blerë në dyqan, sepse mund të kenë nevojë për riparim ose zëvendësim.
17. Zona e dhëmballës së pjekurisë është e ënjtur
Ndjeshmëria pas dhëmballës së fundit mund të shfaqet kur një dhëmballë pjekurie ka mbetur pjesërisht nën mishra. Ushqimi dhe bakteret mund të grumbullohen poshtë indit që e mbulon. Dentisti mund ta pastrojë zonën, të bëjë radiografi dhe të vendosë nëse dhëmbi duhet monitoruar apo hequr.
18. Dhëmbët duken të konsumuar
Skajet e rrafshuara dhe dhëmbët që duken më të shkurtër mund të tregojnë vite të tëra kërcitjeje. Konsumimi mund të shkaktohet edhe nga refluksi i shpeshtë, pijet acide ose larja agresive. Këshillimi i hershëm është i rëndësishëm, sepse smalti i humbur nuk rritet sërish natyrshëm
19. Kafshimi papritur ndihet ndryshe
Nëse dhëmbët nuk bashkohen më si më parë, shkaku mund të jetë një dëmtim, ënjtje ose problem me një mbushje. Mund të vini re se po e zhvendosni nofullën për të përtypur më rehat ose se një dhëmb prek përpara të tjerëve.
20. Dhimbja po pengon jetën e përditshme
Dhimbja që ju pengon të flini, të ushqeheni ose të kryeni aktivitetet normale nuk është më një shqetësim i vogël. Dhimbja e fortë pulsuese, ënjtja e fytyrës ose dhimbja që përhapet drejt veshit apo nofullës mund të tregojnë infeksion urgjent. Kontaktoni menjëherë dentistin.
-
-
-
Nëse kujdeseni për dhëmbët, këto 5 këshilla janë thelbësore
13 Mars, 11:13 -
Burimi: HealthByëealth
