5 “red flags” në një debat që psikologët nuk i injorojnë kurrë

Çdo çift kalon vështirësi dhe konflikte, por sipas psikologes klinike Sabrina Romanoff, ka disa fjali që shfaqen vazhdimisht në marrëdhëniet që po shkojnë drejt fundit. Pas më shumë se një dekade pune me çifte, ajo thotë se këto shprehje nuk janë thjesht të bezdisshme,  ato shpesh përdoren për të shmangur përgjegjësinë, për të minimizuar ndjenjat e partnerit dhe për të krijuar pasiguri.

Sipas saj, askush nuk meriton të jetë në një marrëdhënie ku nevojat e tij anashkalohen vazhdimisht ose ku detyrohet të dyshojë te vetja. Ja cilat janë pesë fjalitë që duhet t’ju bëjnë të reflektoni.

1. “Kështu jam unë”

Në pamje të parë mund të tingëllojë si sinqeritet, por në shumë raste kjo fjali fsheh refuzimin për të ndryshuar. Nëse partneri e përdor për të justifikuar sjellje që ju lëndojnë, ai po ju kërkon t’i pranoni ato pa diskutim.

Psikologia sugjeron të përgjigjeni: “Nuk po të kërkoj të bëhesh dikush tjetër. Po të kërkoj të ndryshosh këtë sjellje.”

2. “Ti je shumë e ndjeshme”

Kjo është një nga mënyrat më të zakonshme për të zhvlerësuar emocionet e dikujt. Në vend që të përballet me atë që ka bërë gabim, partneri e zhvendos fokusin te reagimi juaj.

Një përgjigje e shëndetshme mund të jetë: “Mund të flasim për reagimin tim pasi të flasim për atë që ndodhi.”

Kjo e mban bisedën të fokusuar te problemi i vërtetë.

3. “Të kërkova falje”

Një falje është e rëndësishme, por nuk mjafton gjithmonë. Kur kjo fjali përdoret për t’i dhënë fund debatit pa adresuar problemin, ajo humbet vlerën e saj.

“E dëgjoj që je penduar, por dua të di çfarë do të ndryshojë tani e tutje”, sugjeron Romanoff.

Sepse një falje pa veprime konkrete mbetet vetëm një fjali.

4. “Por unë bëj kaq shumë për ty”

Kjo është një përpjekje për të larguar vëmendjen nga problemi aktual duke numëruar gjërat e mira që janë bërë në të kaluarën. Shpesh shoqërohet edhe me krahasime si: “Ka partnerë shumë më të këqij se unë.”

Por sjelljet e mira të së kaluarës nuk e fshijnë dëmin e së tashmes.

Në vend që të hyni në një debat për “pikët”, mund të thoni: “Nuk po bëj llogari. Po të tregoj çfarë nuk po funksionon tani.”

5. “Ti e bën gjithmonë këtë”

Kur dikush përdor fjalën “gjithmonë”, shpesh po përpiqet ta paraqesë problemin si një defekt të karakterit tuaj dhe jo si një situatë konkrete.

Psikologia rekomandon të riktheni fokusin te ngjarja specifike: “Le të flasim për atë që ndodhi sonte, para se të flasim për një model sjelljeje.”

Çfarë do të thotë në të vërtetë?

Sabrina Romanoff thekson se një përdorim i vetëm i këtyre fjalive nuk do të thotë domosdoshmërisht se lidhja është e destinuar të dështojë. Ajo që ka rëndësi është ajo që ndodh më pas.

Nëse partneri reflekton, dëgjon dhe përpiqet të ndryshojë, marrëdhënia ka ende hapësirë për t’u zhvilluar. Por nëse të njëjtat fjali përsëriten vazhdimisht dhe asnjë bisedë nuk sjell ndryshim, atëherë mund të jetë koha të pyesni veten nëse kjo është vërtet marrëdhënia që meritoni.