Anne Hathaway po e shijon plotësisht pritjen e fëmijës së saj të tretë. Aktorja 43-vjeçare ishte e ftuar në emisionin "Late Night with Seth Meyers", ku foli me humor për shtatzëninë që, sipas saj, erdhi si një surprizë.
"E mrekullueshme. Vërtet e mrekullueshme," tha Hathaway. "Dua të them, e dinim çfarë po bënim, por u habitëm shumë që funksionoi."
Ylli i filmit "Djalli vishet me Prada 2" vazhdoi me shaka:
"Ishim aq të habitur që ndodhi kështu, sa kemi vendosur ta quajmë këtë bebush 'goli i sekondës së fundit'."
Duke qenë 43 vjeç, Hathaway nënkuptoi se shtatzënia erdhi në një moment kur ajo dhe bashkëshorti nuk e prisnin më që gjithçka të ndodhte kaq lehtë, ndaj dhe shoku kur mori vesh lajmin e shtatzënisë ishte i madh.
Aktorja e bëri publik lajmin për shtatzëninë e tretë më 19 qershor përmes një videoje në Instagram, ku shfaqej duke ledhatuar barkun, e veshur gjithashtu me një fustan të bardhë të lirshëm. Krahas videos ajo shkroi:
"Bebush, jam e jotja."
Videoja ka grumbulluar tashmë më shumë se 23 milionë pëlqime. Anne Hathaway dhe bashkëshorti i saj, Adam Shulman, me të cilin u martua në vitin 2012, janë prindër edhe të dy djemve, Jonathan dhe Jack.
Në një intervistë të dhënë më herët për revistën People, aktorja tregoi se të qenit nënë e dy djemve ka ndikuar edhe në mënyrën se si vishet.
"Më pëlqen fakti që të qenit nënë e djemve ka ndikuar te stili im. Duhet të jem gjithmonë gati të kaloj nga një takim serioz pune direkt në një fushë basketbolli. Duhet të jesh në gjendje të luash basketboll në çdo moment, pavarësisht se çfarë ke veshur."
Hathaway nuk kurseu as fjalët e bukura për bashkëshortin e saj, duke e falënderuar për mbështetjen gjatë kësaj periudhe.
"Ai më mbështet plotësisht. Sidomos këtë vit ka qenë ndryshe nga çdo vit tjetër. Të dy e dimë që ndoshta nuk do të përsëritet më një situatë e tillë. Mënyra se si ai mori përsipër gjithçka, në çdo aspekt, është e jashtëzakonshme. Është njeriu më i mrekullueshëm që kam njohur ndonjëherë."
