Disa herë, Blendi Fevziu, drejtuesi i Opinion, ka thënë se i qëndroi besnik Tv Klan për 20 vite prej “lidhjes shpirtërore.” Për të, njeriu identifikohet me vendin ku punon. Kjo lidhje ishte aq e fortë sa një valixhe me pagën e një muaji nuk e bindi të ndërrojë kanal.

Burime për Gazetën Tema thonë se pas 20 vitesh në Tv Klan, Fevziu mund të lëvizë drejt Top Channel. Sipas Temës, fërkimet e Fevziu – Frangaj janë shfaqur në disa intervista të Fevziut ku ai ka folur për oferta të tjera dhe pakënaqësi në punë. Frangaj, nga ana tjetër, i ka injoruar këto deklarata nga “influenca mbi pushtetin.”

Miku i vjetër i Fevziu, Ben Blushi, shërben si drejtor programacioni në Top Channel dhe sipas Gazetës Tema, kjo i ofron një lloj sigurie moderatorit të Opinion. Gjithashtu, thuhet se Fevziu do të ruajë të njëjtën fashë orare në Top Channel, nga e hëna në të enjte.

Faqja e emisionit në Facebook ka ndërruar emrin nga Opinion Tv Klan në Opinion Tv Show, një shenjë kjo e një lëvizjeje të mundshme.

Gjithashtu, Alpe News thotë se kontaktoi me Fevziu në lidhje me thashethemet. Sipas tyre, Fevziu tha se “ende nuk e ka vendosur [lëvizjen]” dhe se ka biseduar me Top Channel.