Prej më shumë se një jave, Xhisiela Maloku dhe ish-partneri i saj, Rexhep Rrahja, djali i deputetit të Krujës, janë në qendër të vëmendjes kudo në vend. Rexhep Rrahja akuzohet se e ka dhunuar Xhisielën, e ka rrahur, e ka djegur me cigare dhe e ka goditur me pistoletë pas koke. E sidoqoftë, ecte i lirë pavarësisht denoncimeve.
Xhisiela Maloku u shfaq me fytyrë në një intervistë për “Open” nga Eni Vasili në Top Channel. Kur të gjithë prisnin që ajo të tregonte të pathënat e incidentit, ajo tha se “i ka thënë nga xhelozia dhe inati. “Kam bërë dëshmi të rremë,” nis ajo.
“Unë kisha bërë një kallzim në komisariatin nr.3 në Tiranë. Ndodhi një konflikt mes nesh. [Rexhepi] më mori në telefon dhe u takuam. Nisën skenat e xhelozisë dhe nisën debatet. Në këtë konflikt, nuk u ushtrua dhunë ndaj meje. Vetëm një shuplakë e lehtë. Jo nga ato që janë thënë nëpër media. Emiliano [Nuhu] i ka ekzagjeruar. Dëshmia ime nuk është ajo që ka nxjerrë Emiliano, dëshmia ime është në prokurori, bashkë me një dëshmi tjetër në Drejtorinë e Përgjithshme të Policisë së Durrësit. Atë që ka nxjerrë Emiliano, nuk e di se ku e ka marrë.
Më pas, Xhisiela konfirmon thyerjen e celularit nga Rexhepi, edhe praninë e dyshes në hotel.
“Në hotel më ftoi Rexhepi. Aty pati zënka normale, vetëm një shuplakë pati në hotel. Në datën 20 shkova në komisariat, por nuk e denoncova. Nuk e denoncova sepse u qetësuam. Dola nga komisariati, e takova [Rexhepin] dhe më kërkoi falje. Ishte aty sepse i pata thënë që do e denoncoja. U sqaruam dhe m’u mbush mendja ta fal. Pasi u pajtuam, në datën 21 shkova sërish në komisariat sepse nuk e mbajti fjalën e dhënë, iku me një tjetër me pushime. U nis më datë 20. E mora vesh përmes shoqeve. [...] Nga inati, shkova e denoncova për dhunë.”
Shenjat në trup, dëshmuar në një dokument zyrtar nga një mjek ligjor, Xhisiela i justifikon kështu:
“Unë nuk e kam lexuar ekspertizën, por shenjat në shpatull janë të një aksidenti me makinë. Makina është dërguar në varreza. Kam shenja cigaresh edhe në vende të tjera në trup, sepse sa herë ziheshim, digjnim veten. Edhe Rexhepin po ta shihni, do t’i gjeni shenja cigaresh nëpër trup. Nga nervat, ia bëjmë vetë vetes.”
Nëse kjo deklaratë e Xhisielës ju duket e dyshimtë, ajo e di:
“Nuk jam nën presion dhe as nën kërcënim. Nuk e kam pranuar mbrojtjen e prokurorisë. E gjithë kjo është bërë për një zënkë xhelozie. Nuk më ka djegur me cigare dhe nuk më ka kërcënuar me pistoletë. Thjesht më ka goditur me shuplakë. Nuk e di pse Nuhu më ka nxjerrë mua në media dhe po përdor njerëz të pafajshëm, duke nisur nga babai i Rexhepit, deputeti Rrahman Rraja.”
