Prej gati dy vitesh, prerja e flokëve në gjatësi mesatare, pak sipër supeve, e njohur si prerja The Bob, është modeli i preferuar i vajzave të famshme, shqiptare dhe të huaja.
Tapeti i kuq i Oscars vërtetoi edhe njëherë që Bob mbetet një ndër të preferuarit. Madje pa frikë mund të themi që momentalisht është i preferuari edhe i atyre që u betuan të mbanin përjetë flokë si të Rapunzel-it.
Në vijim gjeni një listë të shkurtër me këshilla që duhet t’i keni parasysh nëse prerja e ardhshme e flokëve është: The Bob!
Duhet të nisni të rimendoni për make up-in
Bob ka nevojë për një grim më minimalist: buzëkuq nude, qerpikë të lyer dhe pudër. Një model i tillë flokësh nxjerr në pah fytyrën, ndaj sigurohuni të mos e teproni me tone të errëta apo shumë highlighter.
Do të hyni në një botë të tërë aksesorësh
Aksesorë për flokë? Po. Duke qenë që flokët në gjatësi mesatare ta vështirësojnë punën kur bëhet fjalë për t’i kapur bisht, duhet të nisni të investoni tek disa aksesorë, që do t’ju vijnë në ndihmë në ditët e vështira.
Gjithë vëmendjen e ka dekolteja, qafa dhe supet
Flokët e shkurtër ose në gjatësi mesatare si Bob nxjerrin në pah supet, dekoltenë dhe qafën. Që të mos ngjani më e thjeshtë seç duhet, bëni pjesë të garderobës disa veshje që përshtaten me modelin e ri të flokëve: një golf i trashë, këmishë, bluza me jakë. Mund të vishni edhe fustane me dekolte të theksuar, por mos harroni aksesorët.
Blini pajisje që nuk dëmtojnë flokët
Ndonëse mund të keni flokët më të shëndetshëm dhe më të bukur në planet, Bob nuk është një ndër ato modelet e flokëve “zgjodhu dhe dil nga shtëpia”. Për shkak të gjatësisë, do t’ju duhet pak më shumë kohë për t’i stiluar siç duhet. Njëkohësisht që të mos i dëmtoni, sigurohuni që pajisjet si pjastër, tharëse, mashë për kaçurrelat, të jenë cilësore dhe të mbrojnë flokun nga nxehtësia.
