Shqipëria

Paraqitet në Gjykatë babai që pretendohet se vrau të bijën 20-vjeçare

Shkruar nga Anabel

26 Korrik 2019

Paraqitet në Gjykatë babai që pretendohet se vrau të

Përmes një video-telefonate nga spitali, për shkak të gjendjes shëndetësore, Petrit Lekaj, që pretendohet se vrau të bijën 20-vjeçare, realizoi takimin e parë me Gjykatën në Adelaide, Australi. Policia nuk ka bërë publike detaje të tjera, por 49-vjeçari do të vazhdojë të mbetet nën mbikëqyrjen e policisë.

Ai do të mbahet në paraburgim deri në paraqitjen e radhës në Gjykatë, në janar. Avokati i Lekajt nuk përjashtoi mundësinë e kërkesës për liri me kusht.

Sabrina Lekaj u gjet e pajetë në brendi të makinës së saj në Adelaide në Australi. Pranë saj ishte i ati, që akuzohet se e vrau sepse kishte dalë me shoqet një natë më parë. Thuhet se pasi goditi të bijën, 49-vjeçari e drejtoi thikën nga vetja, gjë që i shkaktoi lëndime serioze në zonën e barkut.

Sabrina dhe shoqet e saj shkuan në një club natën para ngjarjes tragjike dhe thuhet se ishte e shqetësuar mos i bërtiste i ati kur të kthehej në shtëpi. Pasi kërceu me mikeshat e saj, Sabrina vendosi të flinte në shtëpinë e shoqes së ngushtë.

Mesazhi i fundit që ajo dërgoi ishte “të dua, të shkruaj kur të shkoj në shtëpi,” drejtuar një shoqeje, Kat Valstar. Por fatkeqësisht, Sabrina nuk arriti dot në shtëpi.

Ajo u diplomua nga shkolla e mesme me një notë prej 99.35/100 dhe studionte piano dhe imazheri në University of South Australia.

Fqinjët thonë se pak orë para tragjedisë, Petrit Lekaj po kosiste i qetë oborrin para shtëpisë.