Dje, në edicionin e pasdites të lajmeve, Top Channel konfirmoi rikthimin e spektaklit reality, “Big Brother.” Skenografi Fatmir Minga tregoi ambientet e Studio Nova, që do të shërbejë si shtëpi për pesë emisione, një prej të cilëve është “Big Brother.” Kjo është hera e parë që shtëpia më e ndjekur në vend ndodhet pranë Top Channel, pasi gjithmonë, banorët kanë jetuar në një ambient larg televizionit.

Punimet janë në fazat fillestare, gjë që lë të kuptohet se spektakli nuk do të nisë këtë sezon televiziv. Ky do të jetë edicioni i dhjetë i “Big Brother” në Top Channel.

Rikthimi i “Big Brother” u njoftua për herë të parë në tetor të 2017-s. Një vit më pas, Ledion Liço publikoi videon promovuese të spektaklit, duke krijuar idenë se do të niste atë sezon televiziv, me atë në krye, dhe se do të kishte banorë personazhe të famshëm.

Sidoqoftë, pas një sërë aludimesh se emisioni do të anullohej si pasojë e kostove, më në konfirmohet rikthimi. Për sa i përket banorëve, në edicionin e lajmeve, emisioni përmendet si thjesht “Big Brother” dhe jo “Big Brother VIP.” Nuk dihet ende kush do ta moderojë, por emrat që përfliten janë Arbana Osmani dhe Luana Vjollca.