Katër gra, sa të ndryshme aq edhe njësoj, pas Luftës së Kosovës, jetojnë në një shtëpi refugjatësh prej kohësh. Jeta e tyre duket e paqtë, e zakonshme, ndonëse përtej të qeshurave fshihet një dramë e madhe. Emira (Rozafa Çelaj), Lumja (Adriana Matoshi), Kumrija (Shengyl Ismaili) dhe nëna Gjyla (Melihate Qena) flasin dhe kuvendojnë me njëra-tjetrën, qeshin dhe grinden në të njëjtën kohë. Të qeshurat e tyre i prish prania e një gruaja kroate, që flet serbisht, Zdenka (Rebekah Qena), që shihet me përbuzje.
Pavarësisht ndjenjës së neverisë që shkakton figura e Zdenkës te katër gratë, ajo është pika lidhëse me të shkuarën dhe të ardhmen e Agës (Arti Lokaj), një djalosh nëntë vjeçar që ka vetëm një qëllim – të mësojë serbisht për të gjetur të atin, të humbur në luftë. E vetmja figurë burrërore në jetën e tij është Cera (Basri Lushtanaku), një personazh që “mbështillet” nga ashpërsia, për të mos treguar të fshehtat e dhimbshme.
Skenaristja dhe regjisorja Lendita Zeqiraj, përmes personazheve, sjell një dëshmi të pacenë të përvojës shkatërruese të luftës. Me qëllim, Zeqiraj e largon vëmendjen nga Aga dhe risjell në mënyrën më fantastike të mundshme portretet e disa grave, që i bashkon një histori, një histori që i përket të shkuarës, por është e pranishme çdo ditë.
Pas çdo sjelljeje të personazheve, qëndron një arsye që zbulohet në një mënyrë ose në një tjetër. Asnjë përvojë nuk mbetet pa “u dokumentuar”, qoftë në portret a lëvizje. Mënyra si personazhet ndërveprojnë me njëri-tjetrin duket disa herë qesharake, e pakuptimtë, derisa në një moment shfaqet një gazetare që ndryshon gjithçka.
Nuk po zbulojmë më shumë seç duhet, pasi “Shpia e Agës”, një film që shënon një moment të veçantë në kinematografinë e Kosovës dhe Shqipërisë, duhet shijuar në mënyrë individuale. Është një nga ato filmat që nuk ka për qëllim të të rëndojë me dramaticitetin e tepërt. Përkundrazi, të qeshurat do t’ju shoqërojnë gjatë gjithë filmit, derisa të kuptoni se ç’fshihet përtej tyre.
“Shpia e Agës” u shfaq gjatë Festivalit të Filmit në Tiranë dhe shpresojmë që të promovohet edhe më shumë në kinematë vendase.
Tjetër artikull i rekomanduar: Për çfarë flet filmi shqiptar që po i drithëron të gjithë
