Nëse mendonit se dashuria për futbollin përfundon te ndeshjet në stadium, fanellat apo postimet në Instagram, Peruja sapo e çoi në një nivel tjetër.
Qindra prindër peruanë kanë vendosur t’u vënë të porsalindurve emrin e Erling Haaland, sulmuesit norvegjez që është kthyer në një nga figurat më të komentuara të Kupës së Botës 2026.
Sipas regjistrit kombëtar të identitetit në Peru, 468 fëmijë mbajnë emrin Haaland, ndërsa 91 të tjerë janë regjistruar me emrin e plotë Erling Haaland.
“Haaland është edhe peruan,” tha me humor Ivan Torres, zëdhënës i regjistrit, për Panamericana Television.
Popullariteti i futbollistit 25-vjeçar është rritur ndjeshëm gjatë këtij Botërori, ku ai ka shënuar 7 gola në 4 ndeshje dhe ka ndihmuar Norvegjinë të arrijë për herë të parë në çerekfinale. Haaland shënoi edhe dy golat në fitoren historike të Norvegjisë ndaj Brazilit.
Megjithatë, Haaland nuk është i vetmi futbollist që ka frymëzuar prindërit në Peru. Sipas të dhënave, 3,402 persona në vend mbajnë emrin Messi, 1,185 janë quajtur Cristiano Ronaldo, 1,241 mbajnë emrin Yamal, ndërsa plot 33,809 persona quhen Neymar.
