Gloria Steinem, e ndarë së fundmi nga jeta, nuk ishte vetëm një nga figurat më të rëndësishme të lëvizjes feministe, por për një periudhë të jetës ishte edhe njerka e aktorit Christian Bale. Steinem ishte e martuar me babanë e Bale, David, nga viti 2000 deri në vitin 2003, kur ai ndërroi jetë nga limfoma e trurit.
Në vitin 2018, aktori tregoi mënyrën e pazakontë se si kishte mësuar se babai i tij dhe Steinem ishin martuar.
“Për mua ishte një lajm i ri”, tregoi Bale për The Guardian. “Isha në Gjermani. E mora vesh pasi ishin martuar.”
Më herët, në vitin 2001, ai foli më gjerësisht për martesën dhe kishte thënë se mezi priste ta shihte të atin me një partnere.
“Në fakt, nuk e kam parë Gloria-n apo babanë tim që nga martesa e tyre, sepse kam qenë larg që prej majit”, tha ai për Interview Magazine. “Duke folur për gjërat e papritura, nuk mendoj se babai im e kishte imagjinuar se diçka e tillë do t’i ndodhte në këtë pikë të jetës.”
Aktori i American Psycho vijoi duke treguar se ai dhe bashkëshortja e tij, Sibi Bla?i?, do të kalonin disa javë me çiftin.
“Do të kalojmë disa javë me të dy së shpejti dhe do të jetë fantastike, sepse jam mësuar që babai im të jetë gjithmonë vetëm... Tani mezi pres ta shoh me një partnere.”
Steinem, e cila dikur kishte qenë kritike ndaj martesës, foli hapur për vendimin e saj për t’u martuar në një deklaratë të publikuar nga organizata Voters for Choice në vitin 2000.
“Edhe pse kam punuar për shumë vite që martesa të bëhet më e barabartë, nuk e kisha menduar kurrë se do ta shfrytëzoja vetë këtë mundësi”, ishte shprehur ajo.
Më tej, Steinem kishte thënë se ishte e lumtur dhe e befasuar nga ky vendim dhe se një ditë do të shkruante për të.
“Jam e lumtur, e befasuar dhe një ditë do të shkruaj për këtë, por tani për tani shpresoj që kjo të dëshmojë atë që feministet kanë thënë gjithmonë: feminizmi ka të bëjë me aftësinë për të zgjedhur atë që është e duhura në çdo moment të jetës sonë.”
Steinem nuk u martua më pas vdekjes së David Bale.
Vdekja e Gloria Steinem u njoftua më 3 shtator. Ajo ishte 92 vjeçe. Sipas deklaratës, Steinem ndërroi jetë paqësisht në shtëpinë e saj në Nju Jork, e rrethuar nga disa prej njerëzve të shumtë që e donin.
“Pothuajse një shekull i jetës së Gloria-s ishte një jetë e jetuar plotësisht dhe ajo vazhdoi të punonte për barazinë deri në fund”, thuhej në deklaratë.
