Pas një beteje ligjore që zgjati gati dy vjet, avokati i Justin Baldonit shpreson që konflikti mes klientit të tij dhe Blake Lively të jetë mbyllur njëherë e mirë dhe që të dy aktorët të mund të vazhdojnë jetën e tyre normalisht, duke hedhur pas krahëve një nga dramat më të bujshme në kinematografi.
Gjatë një interviste në emisionin The Megyn Kelly Show, avokati Bryan Freedman foli për marrëveshjen e arritur mes palëve dhe shpjegoi pse vendosi të publikojë të plotë dokumentin e marrëveshjes. Sipas tij, qëllimi ishte të sigurohej që çështja të mos rihapej në të ardhmen.
“Palët kërkonin një zgjidhje përfundimtare. Marrëveshja nuk i jep mundësi askujt të rikthejë pretendime të mëparshme, si dëmshpërblimet, penalitetet apo kompensimet e tjera financiare”, tha Freedman.
Ai sqaroi se e vetmja çështje që mbetet ende për t’u vendosur është shuma e tarifave ligjore që duhet të paguhen sipas një kërkese që lidhet me pretendimin për shpifje.
Javën e kaluar, gjyqtari Lewis J. Liman vendosi që Blake Lively ka të drejtë të kompensohet për shpenzimet e mbrojtjes së saj ligjore, duke u mbështetur në ligjin kalifornian të vitit 2023, i njohur si Protecting Survivors From Weaponized Defamation Lawsuits Act (Seksioni 47.1). Ky ligj synon të mbrojë viktimat e ngacmimit seksual, abuzimit dhe diskriminimit nga paditë për shpifje që mund të përdoren si formë hakmarrjeje.
Freedman u shpreh se tashmë është koha që të gjithë të ecin përpara.
“Mendoj se më në fund ka marrë fund. Shpresoj që Blake të mund të vazhdojë jetën e saj, ashtu si edhe Justin dhe të gjitha palët e tjera të përfshira. Ka ende disa çështje dytësore që duhen zgjidhur, por thelbi i konfliktit tashmë është mbyllur. Shpresoj që të gjithë t’i urojnë më të mirat njëri-tjetrit dhe të arrijnë në pikën ku të thonë: mjaft është mjaft, mund të mos biem dakord, por duhet të vazhdojmë përpara”, deklaroi ai.
Vendimi për pagesën e tarifave ligjore erdhi një muaj pasi Baldoni dhe Lively arritën një marrëveshje jashtë dyerve të gjykatës. Zgjidhja u arrit vetëm dy javë përpara se çështja të hynte në fazën e gjykimit federal.
