Sfilatat e modës na e kanë paralajmëruar tashmë, por tani është Dua Lipa ajo që e vulos trendin: çanta me print kafshësh është një nga zgjedhjet më të sigurta dhe më “in” për sezonin vjeshtë-dimër 2025/26.
Që në fillim të vitit 2024, motivet që imitojnë gëzofin e leopardit, lëkurën e gjarprit, vijat e zebrës apo edhe pullat e lopës kanë nisur të rikthehen fuqishëm në pasarelat ndërkombëtare. Këtë vjeshtë, ky stil shkon edhe një hap më tej: nga veshjet, printet e kafshëve kalojnë në çanta, duke i kthyer këto të fundit në aksesorë thelbësorë për një pamje që thyen monotoninë.
Shtëpi të njohura si Saint Laurent, Alaïa apo Maison Margiela i përfshinë këto çanta në koleksionet e tyre për këtë sezon. Por ndoshta konfirmimi më i fortë erdhi nga vetë Dua Lipa, një nga ikonat më me ndikim të stilit bashkëkohor.
E veshur me një fustan të zi midi, syze të zeza dhe një palë këpucë me taka të larta, këngëtarja u shfaq në rrugët e New York-ut duke dhënë një tjetër leksion stili. Ajo kishte zgjedhur një çantë me lëkurë leopardi, që i jepte kontrast pamjes së saj tërësisht të zezë, një detaj i vogël, por që ndryshon komplet ‘look’-un, sipas trendeve më të fundit të çantave për sezonin.
