Një ngjarje shokuese ndodhi dje (14 korrik 2025) në Vlorë, ku një vajzë 17 vjeç qëlloi veten me plumb në kokë, teksa ishte në shtëpinë e gjyshërve. E reja, me inicialet H.H. ndodhet në gjendje të rëndë dhe raportohet se është në intubim.
Si ndodhi ngjarja?
17-vjeçarja u shoqërua në spital nga familjarët, pasi u gjet e plagosur në kokë, me armë zjarri. Burimet nga stafi mjekësor bënë me dije se ajo ishte e ndërgjegjshme gjatë mbërritjes në spital. Policia njoftoi se vajza u paraqit në spitalin e Vlorës rreth orës 11:40, pasi dyshohet se ishte vetëplagosur me armë zjarri në banesën e gjyshërve, në lagjen “Kushtrimi”.
Dyshohet se familjarët e saj e gjetën vajzën në gjendje të rëndë. Sipas burimeve, ajo është vetëplagosur afër zonës së syrit, pas një debati me të atin.
Policia e Vlorës shoqëroi të atin e vajzës për ta marrë në pyetje, pasi ai ka qenë i pari që e ka shoqëruar drejt spitalit. I ati i vajzës u rezistoi forcave policore, duke kundërshtuar dhe thënë se donte ta shoqëronte vajzën në spitalin e Tiranës, por nuk është lejuar.
Arrestimi i të atit
Sipas policisë, 17-vjeçarja tentoi t’i jepte fund jetës për shkak të mosmarrëveshjeve që kishte në familje. Dyshohet se i ati kishte ushtruar dhunë ndaj vajzës së tij, duke e rënduar psikologjikisht, deri në pikën që ajo tentoi vetëvrasjen.
I ati u arrestua dhe akuzohet për veprat penale “Dhunë në familje” dhe “Shkaktim vetëvrasjeje”. Dyshohet se ai kishte debatuar me tone të larta me të bijën, pasi donte që ajo të jetonte me të, bashkëshorten e tij të re dhe fëmijët e tyre.
Gjithashtu, në gjendje të lirë është proceduar edhe gjyshi i vajzës, i cili akuzohet për “Mbajtje pa leje dhe prodhim të armëve”, pasi dyshohet se arma me të cilën e mitura tentoi vetëvrasjen, i përkiste atij.
Dyshohet se arma është fshehur nga familjarët, ndaj policia po kërkon për ta gjetur, në mënyrë që të vijojnë hetimet e mëtejshme.
Gjendja e vajzës
Vajza u transportua nga spitali i Vlorës në atë të Traumës në Tiranë dhe ende paraqitet në gjendje të rëndë për jetën. Mjekët janë duke u kujdesur për të, ndërsa ndodhet në intubim.
