Eli Fara ka reaguar përmes një deklarate në Instagram, ku ka folur për cenimin e privatësisë së saj dhe për gjykimet e fyerjet që kanë prekur edhe familjen e saj. Këngëtarja i ka kërkuar publikut të ndalojë shpërndarjen e materialeve private dhe është shprehur se çështjen do t’ia lërë në dorë drejtësisë.
Reagimi vjen pas qarkullimit në internet të videove me përmbajtje intime, të lidhura në raportimet mediatike me kompozitorin Adrian Hila. Publikimi dhe shpërndarja e tyre janë shoqëruar me komente dhe aludime për persona të ndryshëm. Në deklaratën e saj, Fara ndalet te pasojat e ekspozimit të jetës private dhe u kërkon njerëzve të mos bëhen pjesë e shpërndarjes.
“Kam kaluar një jetë në skenë, duke ndarë me publikun këngën dhe dashurinë për artin. Sot po përjetoj një dhimbje që nuk ia uroj asnjë gruaje: cenimin e privatësisë dhe përballjen me gjykime e fyerje që prekin edhe familjen time”, shkruan ajo.
Fara ndalet veçanërisht te mënyra si trajtohen gratë kur u cenohet privatësia, duke theksuar se shpesh u kërkohet të mbajnë mbi supe edhe turpin e veprimeve që kryhen kundër tyre.
“U cenojnë privatësinë dhe pastaj u kërkojnë të japin llogari. I lëndojnë dhe pastaj i gjykojnë për mënyrën si e përballojnë dhimbjen. Asnjë grua nuk duhet të kalojë nëpër këtë poshtërim.”
Këngëtarja përshkruan dhimbjen e të parit të jetës private të kthyer në spektakël dhe të ndjesisë se, për disa njerëz, gjithçka që ka ndërtuar vlen më pak se një moment intim.
“Jam e lënduar, por nuk kam arsye të turpërohem. Turpi u përket atyre që filmojnë, publikojnë dhe shpërndajnë momente private pa dijeninë dhe pëlqimin e një njeriu. Intimiteti i një gruaje nuk është leje për ta poshtëruar.”
Në vijim, ajo thekson se të qenit artiste nuk ia heq të drejtën për privatësi dhe dinjitet. Këtë të drejtë, shkruan Fara, e ka çdo grua, pavarësisht emrit, profesionit apo zgjedhjeve të saj.
Për hapat e mëtejshëm, këngëtarja shprehet se do t’ia lërë çështjen drejtësisë, ndërsa publikut i drejton një kërkesë:
“Nga publiku kërkoj njerëzillëk dhe ndalimin e shpërndarjes. Përpara çdo gjykimi, mendoni për njeriun dhe familjen që po lëndoni.”
Deklarata mbyllet me një falënderim për familjen, miqtë, kolegët dhe të gjithë ata që e kanë mbështetur publikisht apo privatisht, mbështetje që, siç shprehet ajo, po i jep forcë.
“Do të marr kohën që më duhet dhe do të vazhdoj përpara, me dinjitet dhe me kokën lart.”
