FIFA ka hapur procedurë disiplinore ndaj Argjentinës për pankartën me mesazhin për Ishujt Falkland që futbollistët shfaqën pas fitores në gjysmëfinalen e Kupës së Botës ndaj Anglisë në Atlanta.
Teksa Argjentina festonte kualifikimin në finale pas fitores dramatike 2-1, disa prej lojtarëve ngritën një pankartë ku shkruhej: "Las Malvinas son Argentinas" ("Malvinat janë argjentinase"), duke iu referuar Ishujve Falkland, territor britanik në Atlantikun Jugor.
Mosmarrëveshja për këta ishuj zgjat prej dekadash. Ata janë nën administrimin britanik që nga viti 1833 dhe në vitin 1982 u bënë shkak për një luftë 74-ditore mes Britanisë dhe Argjentinës, ku humbën jetën mbi 900 persona, 649 argjentinas dhe 255 britanikë.
Kodi disiplinor i FIFA-s ndalon përdorimin e një aktiviteti sportiv për demonstrime me natyrë jo sportive dhe pankarta shkaktoi debat politik në të dyja anët e Atlantikut. Një zëdhënës i ish-kryeministrit britanik Keir Starmer deklaroi: "Kupa e Botës mund të mos jetë e jona, por Ishujt Falkland janë patjetër." Ndërkohë, Andrew Giuliani, drejtuesi i grupit të punës së Shtëpisë së Bardhë për FIFA-n, mbrojti futbollistët argjentinas, duke thënë se Shtetet e Bashkuara besojnë te liria e shprehjes.
Nuk është hera e parë që një ekip argjentinas përfshihet në një rast të tillë. Në vitin 2014, FIFA e gjobiti Federatën Argjentinase të Futbollit me 20 mijë paund pasi lojtarët shfaqën një pankartë shumë më të madhe me të njëjtin mesazh përpara një ndeshjeje miqësore ndaj Sllovenisë në La Plata.
Lista e shkeljeve që FIFA i atribuon Federatës Argjentinase është edhe më e gjatë. Ajo përfshin thirrje dhe gjeste diskriminuese, vonesa në nisjen e ndeshjeve, mosrespektim të protokolleve të sigurisë dhe organizimit, shfaqjen e mesazheve të papërshtatshme nga ekipi dhe tifozët, si edhe hedhjen e sendeve në fushë nga spektatorët gjatë disa ndeshjeve të Kupës së Botës.
Përveç federatës, disa futbollistë janë nën hetim edhe për incidentet që shpërthyen pas humbjes 1-0 të Argjentinës ndaj Spanjës, pas kohës shtesë në finalen e zhvilluar në stadiumin "New York New Jersey". Teksa Spanja po festonte triumfin, në fushë shpërthyen përplasje mes lojtarëve të të dyja skuadrave.
Në një deklaratë zyrtare, FIFA bëri të ditur se të gjithë të përfshirëve u është dhënë mundësia të paraqesin qëndrimin e tyre, përpara se Komisioni Disiplinor të marrë vendimin përfundimtar në javët në vijim.
-
Lajme në pak minuta: Çfarë po ndodh në botë
30 Korrik, 07:56
