Një hetues i aktiviteteve paranormale, Dan Rivera, u gjend i pajetë në dhomën e hotelit të tij. Ai ishte 54 vjeç. Hetuesi kryesor i Shoqatës së Kërkimeve Psikike të New England në Connecticut, u gjend i vdekur më 13 korrik, gjatë vizitës së tij në Pensilvani, ndërsa ishte në turneun “Devils on the Run”, ku prezantohet kukulla Raggedy Ann, e cila supozohet të jetë e “pushtuar” nga Annabelle.
Sipas regjistrimeve të shërbimit të shpëtimit të qarkut Adams, ekipet emergjente iu përgjigjën një telefonate në një hotel në Gettysburg dhe i dhanë ndihmën e shpejtë (por pa rezultat) Rivera-s. Më tej, organizata konfirmoi vdekjen e tij në një postim në rrjetet sociale.
“Jemi thellësisht të pikëlluar dhe ende po përpiqemi të përballojmë këtë humbje. Dan besonte me gjithë zemër në ndarjen e përvojave të tij dhe edukimin e njerëzve për paranormalen. Mirësia dhe pasioni i tij prekën çdo person që e njihte. Faleminderit për mbështetjen në këtë kohë të vështirë”, shkroi organizata në postim.
Ndalesa në Gettysburg gjatë turneut “Devils on the Run” u organizua nga grupi “Ghostly Images of Gettysburg” në “Soldiers National Orphanage”.
“Ghostly Images of Gettysburg” dha një deklaratë për People më 15 korrik, në të cilën thuhej:
“Ishte një nder për “Ghostly Images of Gettysburg” që të organizonte turneun e njohur ‘Devils on the Run’ këtë fundjavë, ku prezantoi një objekt legjendar me hetues prestigjiozë nga Shoqata e Kërkimeve Psikike të New England. Gjatë vizitës së tyre, ekipi pësoi një humbje të thellë me vdekjen e papritur të Dan Rivera, hetuesi kryesor i shoqatës. Trashëgimia e tij do të vazhdojë të frymëzojë brezat e ardhshëm”.
“Dan ishte një figurë e dalluar në komunitetin e kërkimeve paranormale dhe do të mbahet mend për mirësinë dhe udhëheqjen e tij,” shkruhej në deklaratë.
“U shprehim ngushëllimet tona më të sinqerta familjes, miqve dhe kolegëve të Dan. Ndërsa pikëllohemi për humbjen e një miku të dashur, ritheksojmë përkushtimin tonë për të ruajtur historinë e pasur dhe përvojat paranormale që bëjnë Gettysburg-un kaq të veçantë”, përmbyllet deklarata.
Sipas website-s së shoqatës, Rivera punoi mbi kërkime dhe hetime paranormale për më shumë se 10 vjet. Ai lindi dhe u rrit në Bridgeport, Connecticut.
“Në moshë të hershme u njoh me fenomenet e fantazmave, pasi kishte qenë dëshmitar i ngjarjeve paranormale që ndodhnin në shtëpinë e tij,” thuhej në biografinë e tij, e cila përmendte gjithashtu se ai ishte ekspert në rite dhe rituale të ndryshme.
Shkaku i vdekjes së Rivera-s nuk është zbuluar.
Sa i përket kukullës famëkeqe, origjina e saj daton në vitin 1968, kur një studente e infermierisë e mori kukullën si dhuratë në shtëpinë e saj, ku jetonte së bashku me një mike.
“Pothuajse menjëherë, shoqet e dhomës panë ngjarje të çuditshme me kukullën dhe u njohën me një medium ku u tha se kukulla ishte e pushtuar nga shpirti i një vajze të re të quajtur Annabelle”.
“Të dyja përpiqeshin ta pranonte shpirtin e kukullës dhe ta kënaqnin atë, por në këmbim merrnin vetëm keqdashje dhe qëllime të dhunshme”, rrëfen organizata. Më tej, themeluesit e kësaj organizate, Ed dhe Lorraine Warren, u ftuan në shtëpinë e vajzave dhe përcaktuan se Annabelle ishte e pushtuar. Ata e morën kukullën nga shtëpia dhe e ruajtën në një kuti qelqi “për të mbajtur të izoluar entitetin me shpirt të keq.”
Historia e Annabelle dhe çiftit të hetuesve paranormalë frymëzoi sagën horror “The Conjuring”.
