Aktorja irlandeze Brenda Fricker, e njohur për rolin e saj si "gruaja me pëllumba" në filmin "Home Alone 2: Lost in New York", është ndarë nga jeta në moshën 81-vjeçare.
Lajmi u konfirmua nga agjenti i saj, Phil Belfield, i cili bëri të ditur për BBC se Fricker ndërroi jetë të enjten në Dublin.
"Nuk do të shohim më kurrë askënd si ajo dhe bota është më e varfër pa të. Ishte një nder ta njihja, ta doja dhe të punoja me të. Ajo do të ketë gjithmonë një vend në zemrën time dhe në zemrat e miliona fansave të kinematografisë dhe televizionit në mbarë botën", u shpreh ai.
E lindur më 17 shkurt 1945, Brenda Fricker ishte një nga aktoret më të vlerësuara të Irlandës, me një karrierë që zgjati më shumë se gjashtë dekada në teatër, film dhe televizion. Ajo interpretoi në mbi 30 filma dhe prodhime televizive, duke u bërë një nga emrat më të respektuar të kinemasë irlandeze.
Në vitin 1990, Fricker hyri në histori si gruaja e parë irlandeze që fitoi një Oscar, duke u vlerësuar me çmimin për Aktoren më të Mirë në Rol Dytësor për interpretimin e saj në filmin "My Left Foot". Gjatë karrierës së saj luajti në filma të njohur si "The Field", "Home Alone 2: Lost in New York", "I Married an Axe Murderer", "Angels in the Outfield", "A Time to Kill", "Veronica Guerin", "Inside I'm Dancing" dhe "Albert Nobbs".
Në vitin 2008, ajo u nderua me çmimin Maureen O'Hara në Festivalin e Filmit Kerry për kontributin e saj në kinematografi, ndërsa në vitin 2020 u përfshi nga The Irish Times në listën e aktoreve më të rëndësishme të kinematografisë irlandeze.
Sa i përket jetës personale, Brenda Fricker ishte e martuar me regjisorin Barry Davis nga viti 1979 deri në vitin 1988. Edhe pas divorcit, të dy ruajtën një miqësi të ngushtë deri në vdekjen e tij në vitin 1990.
