Hailey Bieber e nxori fustanin e gjumit në rrugë dhe, çuditërisht, duket *yll*

Foto: Backgrid

Vjeshta e këtij viti duket se do të sjellë një rikthim të fortë të veshjeve që deri tani i kemi menduar vetëm si rroba gjumi. Fustanet e hollë me rripa dhe detaje dantelle po dalin nga dhoma e gjumit dhe po bëhen pjesë e veshjeve për jashtë, në një rikthim nostalgjik në stil të viteve ’90 që tashmë po pëlqehet nga emra si Dakota Johnson, Vittoria Ceretti dhe, së fundmi, Hailey Bieber.

Më 7 shtator, Bieber u shfaq me një tjetër fustan të tillë, këtë herë një model me motive leopardi nga Roberto Cavalli, të kombinuar me sandale Manolo Blahnik dhe një çantë të vogël.

Për një mbrëmje sushi me bashkëshortin e saj në Los Angeles, Bieber iu rikthye estetikës së viteve ’90 me një fustan të ngushtë me rripa të hollë, të zbukuruar me dantellë ngjyrë fildishi në pjesën e dekoltesë dhe në fundin deri te gjunjët.

Motivi i leopardit, me nuanca të ftohta, duket se përcaktoi edhe pjesën tjetër të veshjes. Ajo zgjodhi sandalet e saj të preferuara ngjyrë kafe të errët nga Manolo Blahnik dhe një çantë të vogël nga The Row, duke krijuar një kombinim në tonalitete të pasura çokollate.

Duke qenë se vetë Hailey Bieber është rritur në vitet ’90, ajo e plotësoi pamjen me një byzylyk të artë në kyçin e këmbës, vathë me diamante dhe syze dielli të stilit të vjetër me formë ovale.

Por kjo nuk është hera e parë që Bieber kombinon veshje të frymëzuara nga të brendshmet me çanta të vogla në stilin e viteve ’90.

Në korrik, ajo veshi një fustan të ngjashëm në ngjyrë bordo, të kombinuar me shapka me taka nga The Row dhe një çantë dore me pamje krokodili nga Toteme. Çanta ishte zgjedhur në të njëjtën nuancë me detajet e zeza prej dantelle të fustanit.

Nëse ka një përfundim që mund të nxirret nga zgjedhjet e fundit të Hailey Bieber, është se fustani i hollë që deri tani e mbaje vetëm në sirtarin e rrobave të gjumit mund të ketë ardhur koha të dalë në rrugë.

Këtë vjeshtë, fustani me pamje të brendshmesh po fiton statusin e një veshjeje për dalje dhe mund të kombinohet fare lehtë me pjesët klasike të gardërobës, njësoj si fustani i zi.