Një grua nga Oklahoma, SHBA, e njohur në rrjetet sociale për postimet rreth jetës si nënë, u vra në shtëpinë e saj, pak kohë pasi publikoi një video ku aludonte se bashkëshorti i saj kishte abuzuar seksualisht me një të mitur. Sipas autoriteteve dhe dokumenteve gjyqësore, policia dyshon se ishte pikërisht ai që e vrau.
Sara Duffey, 43 vjeçe, e njohur edhe si Sara Gilson, dhe Jeremiah Shawn Duffey, 48 vjeç, u gjetën të vdekur nga plagë me armë zjarri të enjten, në një banesë pranë qytetit Tulsa, bëri të ditur policia lokale.
Hetuesit dyshojnë se Jeremiah qëlloi Sara-n dhe më pas vrau veten.
Më 10 qershor, Sara kërkoi një urdhër mbrojtjeje, që synonte ta mbante Jeremiah-n larg shtëpisë së çiftit. Po atë ditë, një grua tjetër paraqiti gjithashtu kërkesë për urdhër mbrojtjeje, për ta mbajtur Jeremiah-n larg vajzës së saj, tregojnë dokumentet e gjykatës.
Sipas dokumenteve ligjore, Jeremiah u kap nga një tjetër trajner i një ekipi basketbolli për të rinj duke puthur dhe prekur në mënyrë të papërshtatshme një vajzë të mitur.
Më pas, ajo i tregoi të ëmës se Jeremiah i kishte dërguar mesazhe të papërshtatshme, e kishte ftuar në dhomën e tij të hotelit gjatë një udhëtimi dhe madje i kishte dhënë para që, sipas dokumenteve, kishin për qëllim ta detyronin të mos tregonte.
Në kërkesën e saj, Sara përsëriste të njëjtat akuza, por shtonte se Jeremiah kishte një armë zjarri dhe ishte “arratisur”.
Më 11 korrik, Sara publikoi një video për dhjetëra mijëra ndjekësit e saj në TikTok. Në të, ajo shfaqej e ulur në një karrige, me fytyrë të mërzitur, ndërsa sipër videos shkruhej:
“Duke u përgatitur për momentin kur Netflix të publikojë një dokumentar për bashkëshortin tim, së shpejti ish-bashkëshort, për të cilin sapo zbulova se është pedofil.”
@mrsgilson I wish I was joking. #plottwist #netflix #documentary ? original sound - Sara ???
“Do të doja të isha duke bërë shaka," shkroi Sara në përshkrimin e videos, të publikuar në profilin e saj “mrsgilson”, ku zakonisht postonte video për trendet e modës dhe për dy fëmijët e saj.
Dymbëdhjetë ditë më vonë, policia tha se mori një telefonatë në orën 23:15 nga brenda shtëpisë së Sara-s. Sipas policisë, gjatë telefonatës dëgjohej një grua që bërtiste, ndërsa në sfond u dëgjua “diçka që dukej si një e shtënë me armë," raportoi NBC News.
Më pas, një telefonatë e dytë erdhi nga shtëpia e një fqinji. Ishte një djalë, i cili kishte shkuar te fqinji dhe kishte raportuar se njerku kishte qëlluar nënën e tij, tha policia. Kur efektivët mbërritën për të hetuar ngjarjen, gjetën trupat e Sara-s dhe Jeremiah-s.
Lajmi për vrasjen e saj bëri që videoja e publikuar më 11 korrik të shpërndahej gjerësisht në rrjetet sociale.
Një fushatë online për mbledhjen e fondeve për fëmijët e Sara-s e përshkruan atë si “një nënë të jashtëzakonshme”, e cila “i donte jashtëzakonisht shumë, punonte fort për t’u siguruar gjithçka dhe ëndërronte t’u jepte jetën më të mirë të mundshme”.
“Fëmijët e saj ishin qendra e botës së saj," shkruhet në përshkrimin e fushatës. “Dhe gjithçka që bënte, e bënte për ta.”
