Shumica prej nesh do të merrnim me vete fustane të lehta, pantallona të shkurtra dhe sandale për pushimet në Majorka, por Jennifer Aniston zgjodhi një kombinim që nuk e ka braktisur që prej viteve ’90: xhinse, shapka të zeza dhe një kanotierë të bardhë.
Aktorja shkoi së fundmi në ishullin e njohur spanjoll për pushimet e saj verore. Majorka ka tërhequr prej vitesh disa prej emrave më të njohur, nga Audrey Hepburn te Dua Lipa, ndaj nuk ishte çudi që Jennifer zgjodhi këtë destinacion. Por çfarë tërhoqi vëmendjen ishte garderoba që aktorja kishte marrë me vete.
Edhe pse programi i saj dukej se përfshinte kryesisht shëtitje me jaht, Aniston u shfaq me xhinse bootcut, shapka dhe çantën Margaux nga The Row. Në thelb, ishte pikërisht formula që ajo ka veshur vazhdimisht që prej viteve ’90.
Që nga roli që i dha famë, dhe që mbetet ndoshta më ikoniku i karrierës së saj, Rachel Green në “Friends”, aktorja nuk është larguar kurrë nga stili i saj karakteristik minimalist.
Kjo është edhe një nga arsyet pse mënyra e saj e të veshurit vazhdon të ketë ndikim. Pavarësisht ndryshimeve të trendeve, kombinimet e Aniston janë gjithmonë të thjeshta, por të kuruara. Ajo zgjedh veshje bazë që mund të gjenden në çdo garderobë të ndërtuar mirë, ndaj siluetat e saj rrallë duken të vjetruara.
Edhe pse me shumë gjasë qasja juaj ndaj veshjeve të pushimeve verore ndryshon nga ajo e Jennifer Aniston, ka diçka për t’u admiruar te vendosmëria për t’i qëndruar besnike stilit personal, edhe kur kjo nënkupton të veshësh xhinse në ditët kur temperaturat mund të kalojnë 30°C.
