Jennifer Lawrence më në fund iu dorëzua Instagramit. Aktorja hapi llogarinë e saj në platformë dhe brenda më pak se 24 orësh mblodhi pothuajse 1 milion ndjekës, duke sjellë ndërmend rekordin e Jennifer Aniston, e cila gjithashtu pati një numër rekord ndjekësish kur iu bashkua Instagramit.
Por Lawrence duket se po e merr me pak më shumë rezervë eksperiencën në rrjetet sociale. Në videon e saj të parë, aktorja paralajmëroi me humor se mund të largohet menjëherë nëse përballet me komente negative.
“Po i jap një shans, por nëse dikush thotë diçka negative, thjesht do të largohem. Nuk ka problem. Nëse dikush mendon diçka të keqe, do ta zbuloj dhe do të iki”, tha ajo.
Dhe për ata që nuk e kuptuan mesazhin, Lawrence e bëri edhe më të qartë në një postim në Instagram Story:
“Ju lutem kini parasysh se çdo koment i keq ose agresiv mund të ndikojë negativisht tek foshnja. Unë jam foshnja.”
Ndërkohë, aktorja zbuloi edhe një tjetër “problem” sapo hapi llogarinë. Emri @jenniferlawrence ishte tashmë i zënë, ndaj ajo u detyrua të përdorë @jlaw. Në ditët e para në Instagram, Lawrence ka nisur të ndjekë edhe disa prej kolegëve dhe miqve të saj, mes tyre Martin Scorsese dhe Leonardo DiCaprio, me të cilët ka bashkëpunuar së fundmi në filmin psikologjik “What Happens at Night”.
