Kaia Gerber është në kopertinën më të fundit të Harper’s Bazaar dhe, në intervistën për revistën, flet hapur për marrëdhënien me nënën e saj, supermodelen Cindy Crawford. Edhe pse vajza e një prej grave më ikonike të modës, 24-vjeçarja thotë se fëmijëria e saj ka qenë “jashtëzakonisht normale”.
Sigurisht, “normale” me disa nuanca jo fort të zakonshme.
Kaia rrëfen se muret e shtëpisë ku u rrit ishin të mbushura me fotografi nudo të Cindy-t, përfshirë edhe setin e famshëm bardhë e zi për Playboy në vitin 1988, realizuar nga Herb Ritts.
Për Kaia-n, këto imazhe nuk kishin asgjë provokuese:
“Për mua ishin artistike. Nuk kishte vulgaritet, nuk kishte objektifikim”.
Ajo shton se të rritesh në një shtëpi “pa turp për trupin e femrës” ishte një dhuratë e vërtetë. Edhe pse fëmijëria e saj ka qenë disi e izoluar, Kaia e përshkruan atë si diçka shumë pozitive.
Ajo ka ndjekur shkollë publike, ka bërë teatër, ka marrë pjesë në shfaqje komunitare, ka kënduar në kor, ka kërcyer dhe ka pasur një jetë larg idesë së vajzës “së rritur në flluskë”.
Së fundmi, Kaia ka rikthyer edhe një nga pamjet më ikonike të Cindy-t nga vitet ’90, duke u shfaqur me një kombinim të pazakontë: triko të zezë të lirshme, fund rozë me pala, taka rozë dhe çorape blu elektrike. Një homazh i qartë për fushatën e Versace të vitit 1994, që Cindy Crawford e realizoi përkrah emrave si Claudia Schiffer dhe Christy Turlington.
E po, pas së gjithash, dardha bie nën dardhë!
