Në momentin kur moderatori Ledion Liço lexoi vendimin e Vëllait të Madh në studio, gjithçka ishte shumë e qartë dhe e artikuluar bukur. "Big Brother VIP", na u rikujtua, nuk është thjesht një format televiziv, por një hapësirë që synon të nxjerrë në pah dinamikat njerëzore, zgjidhjen e konflikteve përmes komunikimit dhe, mbi çdo gjë tjetër, respektin dhe përgjegjësinë personale. Dhe mbi çdo lojë, mbi çdo strategji, mbi çdo prime, qëndron një vlerë që “nuk negociohet kurrë”: dinjiteti njerëzor.
Fjalë të mëdha dhe, për një moment, edhe shumë bindëse.
Sepse menjëherë pas kësaj deklarate, Keijsi u përjashtua nga gara për shkelje të rregullores në mënyrë të përsëritur, për bullizim, për gjuhë denigruese dhe kërcënuese, dhe për cenim të drejtpërdrejtë të dinjitetit personal, përfshirë orientimin seksual të një banori tjetër, Kristit. Vendimi ishte i qartë, i argumentuar dhe i panegociueshëm. Mesazhi ishte i prerë: ka kufij që nuk kalohen, pavarësisht lojës apo audiencës.
Ky mesazh zgjati deri në mesditë.
Vetëm pak orë më vonë, i njëjti Keijsi u shfaq i ftuar në programet e të njëjtit grup mediatik: në “Shqipëria Live” në drekë, më pas në “Big Brother Radio” dhe pak orë më parë te "Breaking".
Keijsit iu dha një mikrofon, kohë televizive, kohë radiofonike dhe hapësirë për të shpjeguar dhe për të ndarë emocionet e tij. Ky ishte një kontrast i dukshëm mes asaj që u tha dhe asaj që u bë. Kështu, vëmendja zhvendoset shpejt nga çfarë u cenua tek ai që e cenoi dhe ndëshkimi rrezikon të duket më shumë si episod sesa si kufi.
Që të jemi të qartë: askush nuk po thotë që Keijsi nuk duhet të ketë të drejtë të flasë më kurrë. Askush nuk po kërkon që ai të përjashtohet përgjithmonë nga studiot televizive (sepse me shumë gjasa, do ta shohim së shpejti edhe në "E Diell"). Pyetja reale nuk është a duhet të flasë, por kur, si dhe në çfarë konkteksti.
Sepse kur një media shpall publikisht se një sjellje është aq e rëndë sa për përjashtim të menjëhershëm dhe e justifikon këtë me mbrojtjen e dinjitetit njerëzor, koherenca kërkon distancë, reflektim dhe përgjegjësi, jo një rikthim të menjëhershëm në ekran, pa asnjë shenjë pendese apo autokritikë. Kur ndëshkimi ndodh në darkë dhe, që në drekë, i jepet sërish mikrofon, përjashtimi nga “Big Brother VIP” duket më shumë ritual sa për procedurë sesa qëndrim parimor.
Mesazhi: Diskriminimin, bullizimin dhe cenimin e dinjitetit njerëzor e ndëshkojmë në darkë dhe e kthejmë në përmbajtje në drekë.
Media nuk flet vetëm me deklaratat që lexon në prime. Flet edhe (dhe ndonjëherë më fort) me zgjedhjet që bën më pas.
