Irani dhe SHBA drejt një marrëveshjeje të re, në fokus edhe Ngushtica e Hormuzit
Një zyrtar i lartë iranian ka deklaruar se drafti përfundimtar i memorandumit mes Iranit dhe SHBA-së përfshin një sërë çështjesh kyçe, nga programi bërthamor i Teheranit deri te sanksionet ndaj industrisë së naftës. Sipas tij, marrëveshja përfundimtare pritet të diskutohet brenda 60 ditëve pas miratimit nga të dyja palët.
Drafti parashikon rihapjen e menjëhershme të Ngushticës së Hormuzit për të gjitha anijet tregtare, ndërsa SHBA do të nisë heqjen e bllokadës detare ndaj porteve iraniane. Procesi i heqjes së bllokadës do të fillojë menjëherë pas nënshkrimit dhe pritet të përfundojë brenda 30 ditësh.
Britania ndalon një cisternë ruse në Kanalin Anglez, Ukraina falenderon Londrën
Ministri i Jashtëm i Ukrainës ka falenderuar Mbretërinë e Bashkuar për “udhëheqjen dhe veprimin vendimtar” pasi autoritetet britanike ndaluan një cisternë nafte ruse në Kanalin Anglez. Operacioni u zhvillua të dielën dhe zgjati rreth gjashtë orë.
Sipas qeverisë britanike, komandot e Marinës Mbretërore dhe oficerët e Agjencisë Kombëtare të Krimit hipën në bordin e anijes ruse Smyrtos. Operacioni u mbështet nga helikopterë ushtarakë, avionë të Forcave Ajrore Mbretërore dhe anije të marinës britanike.
SHBA ndalon aksesin e të huajve në disa modele të avancuara të inteligjencës artificiale
Administrata amerikane ka urdhëruar kompaninë Anthropic të pezullojë aksesin e shtetasve të huaj në disa nga modelet e saj më të fuqishme të inteligjencës artificiale. Masa është marrë për arsye sigurie kombëtare, sipas një njoftimi të kompanisë.
Anthropic bëri të ditur se ka marrë një letër zyrtare nga qeveria amerikane, duke i kërkuar të ndërpresë përdorimin e modeleve Fable 5 dhe Mythos 5 për të gjithë shtetasit e huaj, brenda dhe jashtë SHBA-së. Kompania theksoi se modelet e tjera të saj nuk do të preken nga ky vendim.
Rusia përdor “flotën fantazmë” për të shmangur sanksionet
Autoritetet perëndimore po shtojnë përpjekjet për të goditur të ashtuquajturën “flotë fantazmë” të Rusisë, një rrjet anijesh që përdoret për transportin e naftës jashtë skemave të sanksioneve ndërkombëtare. Këto mjete lundruese operojnë shpesh me pronësi dhe sigurime të paqarta.
Sipas vendeve perëndimore, kjo flotë i mundëson Moskës të vazhdojë eksportet e naftës pavarësisht kufizimeve të vendosura pas nisjes së luftës në Ukrainë. Ndalimi i cisternës Smyrtos nga Britania shihet si pjesë e përpjekjeve për të frenuar këtë praktikë.
