SHBA dhe Arabia Saudite firmosin marrëveshje bërthamore
Shtetet e Bashkuara dhe Arabia Saudite kanë nënshkruar një marrëveshje për zhvillimin e një programi civil bërthamor në mbretëri. Marrëveshja u firmos nga Sekretari amerikan i Energjisë, Chris Wright, dhe ministri saudit i Energjisë, Abdulaziz bin Salman.
Edhe pse administrata Trump nuk publikoi detaje të plota, marrëveshja mund t’i hapë rrugën Arabisë Saudite të pasurojë uranium për përdorim civil. Dokumenti përfshin gjithashtu masa dypalëshe për parandalimin e përhapjes së armëve bërthamore.
BE pranon tarifat e reja të SHBA-së me 15%
Bashkimi Evropian është i gatshëm të pranojë tarifat e reja që SHBA pritet të vendosë për produktet e lidhura me punën e detyruar, për sa kohë që ato nuk kalojnë kufirin prej 15%. Kjo është marrëveshja e arritur më herët mes palëve në Turnberry të Skocisë.
Regjimi aktual tarifor skadon këtë javë, ndërsa autoritetet amerikane kanë paralajmëruar se detyrimet e reja do të hyjnë së shpejti në fuqi. Brukseli po ndjek nga afër zhvillimet për të siguruar që marrëveshja tregtare të respektohet.
Luvri rihap Galerinë Apollo, pa bizhuteritë mbretërore
Muzeu i Luvrit ka rihapur Galerinë Apollo, gati një vit pas grabitjes spektakolare të bizhuterive të Kurorës Franceze. Hapësira është rikthyer në funksionin e saj origjinal si galeri shtetërore e shekullit XVII, pa vitrina dhe pa ekspozimin e bizhuterive.
Objektet që nuk u vodhën do të zhvendosen në një sallë të re me masa të forta sigurie. Grabitja e vitit 2025, me një dëm të vlerësuar në 88 milionë euro, ende nuk është zbardhur dhe sendet e vjedhura nuk janë gjetur.
Elon Musk sfidon Christopher Nolan: Premton një version “të vërtetë” të “The Odyssey”
Pas suksesit të madh të filmit The Odyssey të Christopher Nolan, Elon Musk ka deklaruar se inteligjenca artificiale Grok do të realizojë një version të plotë të veprës së Homerit, që sipas tij do të jetë “historikisht i saktë”.
Miliarderi, i cili prej muajsh ka kritikuar filmin e Nolan, tha se projekti do të përfundojë para fundit të vitit. Ai madje propozoi edhe financimin e një përshtatjeje të veprës letrate me Mel Gibson, duke kërkuar dialogë në greqishten homerike dhe një paraqitje sa më besnike të poemës origjinale.
