Berlini në zi pas sulmit në Paradën e Krenarisë, shtohen pikëpyetjet për reagimin e autoriteteve
Banorët e Berlinit kanë ngritur një memorial pranë Portës së Brandenburgut për të nderuar viktimat e sulmit që tronditi Paradën e Krenarisë. Sulmuesi, Abdul Ballout, vrau një grua dhe plagosi 29 persona pasi përplasi turmën me një furgon dhe më pas sulmoi kalimtarët me hanxhar.
Autori u vra nga policia pas një operacioni të gjerë kërkimi. Prokuroria bëri të ditur se ai kishte precedentë penalë dhe kishte tentuar t'i bashkohej grupit terrorist ISIS në Siri. Ngjarja ka ngritur debat nëse autoritetet mund ta kishin parandaluar sulmin.
SHBA dhe Irani ndalojnë sulmet, diplomacia rifiton një tjetër shans
Shtetet e Bashkuara dhe Irani pezulluan sulmet për natën e tretë radhazi, ndërsa përpiqen t'i japin një mundësi të re bisedimeve diplomatike. Ambasadori amerikan në OKB, Mike Waltz, deklaroi se presidenti Donald Trump po i lë hapësirë diplomacisë.
Megjithatë, ai paralajmëroi se SHBA po dërgon forca të tjera ushtarake në rajon dhe se "të gjitha opsionet mbeten mbi tryezë". Sipas tij, regjimi iranian duhet t'i marrë seriozisht paralajmërimet e Uashingtonit.
Irani paralajmëron Bullgarinë për bazat ushtarake të përdorura nga SHBA
Irani i ka dërguar një paralajmërim të ri Bullgarisë pasi vendi lejoi përdorimin e bazave të tij ushtarake nga Shtetet e Bashkuara. Teherani akuzon Sofjen se po mbështet operacionet ushtarake amerikane kundër Iranit.
Ministria e Jashtme iraniane deklaroi se vendimet e autoriteteve bullgare mund të kenë pasoja serioze, ndërsa theksoi se marrëdhëniet mes popullit iranian dhe atij bullgar kanë qenë tradicionalisht të bazuara në respekt të ndërsjellë.
Sulm me thika në Paris, plagosen tre gra, njëra prej tyre shtatzënë
Tre gra mbetën të plagosura pas një sulmi në zonën Porte de Clichy, në veriperëndim të Parisit. Autori u neutralizua dhe u arrestua nga një polic jashtë shërbimit, i cili u vlerësua për reagimin e shpejtë.
Viktimat, të moshës 19, 24 dhe 36 vjeç, u dërguan në spital për trajtim. Sipas mediave franceze, njëra prej tyre është shtatzënë, ndërsa autoritetet vijojnë hetimet për motivet e sulmit.
