Droni shpërthen pranë tubacionit strategjik, Bullgaria thërret ambasadorin ukrainas
Një dron i paidentifikuar, i një modeli të përdorur gjerësisht nga ushtria ukrainase, ka shpërthyer pranë tubacionit strategjik të gazit Trans-Ballkanik, në zonën kufitare mes Bullgarisë dhe Rumanisë. Sipas autoriteteve bullgare, droni hyri në hapësirën ajrore të vendit nga Rumania dhe shpërtheu rreth 1,000 metra larg tubacionit që lidh Turqinë me Ukrainën.
Ukraina ka mohuar të ketë shënjestruar Bullgarinë. Ministria bullgare e Mbrojtjes tha se bëhet fjalë për një lloj droni të përdorur gjerësisht nga ushtria ukrainase, ndërsa ministrja e Jashtme ka thirrur ambasadorin ukrainas për një takim të hënën lidhur me incidentin.
FIFA del në mbrojtje të Infantino-s pas akuzave për pagesë gjashtëshifrore
FIFA ka dalë në mbrojtje të presidentit të saj, Gianni Infantino, duke denoncuar atë që e cilëson si një “përpjekje të koordinuar dhe të vazhdueshme” për të minuar drejtimin e organizatës. Deklarata u publikua një ditë pasi gazeta britanike “The Daily Telegraph” ngriti pikëpyetje mbi një pagesë gjashtëshifrore të bërë nga UEFA për një punonjëse që kishte punuar me Infantino-n kur ai ishte sekretar i përgjithshëm i UEFA-s.
Sipas “The Daily Telegraph”, gruaja dyshohet se ka marrë një shumë prej gjashtë shifrash nga UEFA pas një lidhjeje të pretenduar romantike me Infantinon. Raportimet pretendojnë gjithashtu se gjatë periudhës së marrëdhënies së tyre, ajo ishte promovuar në detyrë nga Infantino. Akuzat nuk janë konfirmuar në mënyrë të pavarur.
Zelensky në Beograd, Vuçiç paralajmëron për një tjetër dimër të vështirë
Presidenti ukrainas Volodymyr Zelensky dhe homologu i tij serb, Aleksandar Vuçiç, zhvilluan bisedime në Beograd, ndërsa lufta në Ukrainë po përshkallëzohet sërish. Vuçiç tha se shpreson që lufta të përfundojë sa më shpejt, por shprehu dyshime se kjo mund të ndodhë në një të ardhme të afërt.
Zelensky mbërriti në Beograd të premten, në vizitën e tij të parë zyrtare në Serbi që prej marrjes së detyrës në vitin 2019. Takimi zhvillohet në një moment kur Serbia, pavarësisht lidhjeve të saj historike me Rusinë, po përpiqet të avancojë rrugën drejt anëtarësimit në Bashkimin Evropian.
Kriza e emigracionit përplasje mes Italisë dhe Spanjës, Madridi rikthen kontrollet kufitare