Zjarret vrasin dy persona në Greqi dhe shkatrrojnë rezervatin natyror belg
Një çift i moshuar humbi jetën në zjarret që përfshinë ishullin grek të Salaminës, ndërsa më shumë se 500 persona u evakuuan nga zona e rrezikuar.
Në Belgjikë, zjarri më i madh i regjistruar në historinë moderne të vendit ka përfshirë rreth 3 mijë hektarë në rezervatin natyror High Fens, duke detyruar qindra banorë të largohen dhe duke mobilizuar qindra zjarrfikës nga Belgjika dhe Gjermania, si edhe mjete ajrore nga disa vende europiane.
Ndërkohë, zjarret vazhdojnë të përhapen edhe në Spanjë dhe Portugali, ku një ushtar humbi jetën gjatë operacioneve në Aragon, ndërsa vala e fortë e të nxehtit po krijon kushte ideale për përhapjen e flakëve në pjesë të mëdha të Europës.
Kievi mund ta godasë Rusinë me raketa balistike vendase brenda muajsh
Ish-ministri ukrainas i Mbrojtjes, Mykhailo Fedorov, thotë se Ukraina mund të jetë në gjendje të godasë Rusinë me raketa balistike të prodhuara në vend brenda 3–6 muajve, një zhvillim që do ta bënte shumë më të vështirë mbrojtjen ruse ndaj sulmeve ukrainase.
Ndërkohë, Ukraina kreu një nga sulmet më të mëdha me dronë që nga nisja e luftës, ndërsa Moska pretendon se rrëzoi 1,478 dronë ukrainas brenda 24 orëve.
Luftimet vijuan edhe në anën tjetër, me sulme ruse që shkaktuan viktima në Ukrainë, ndërsa BE-ja po përgatit zgjerimin e sanksioneve ndaj Rusisë.
Jared Kushner takohet me Hamasin përpara bisedimeve me Netanyahu-n për Gazën
Jared Kushner, dhëndri dhe i dërguari i Donald Trump, u takua në Egjipt me kreun politik të Hamasit, Khalil al-Hayya, në një përpjekje për të zhbllokuar marrëveshjen e armëpushimit në Gaza.
Takimi vjen përpara bisedimeve të Kushner me Benjamin Netanyahu, i cili ka refuzuar planin amerikan me 15 pika që parashikon çarmatimin e Hamasit dhe tërheqjen graduale të forcave izraelite nga Gaza.
Ndërkohë, Hamasi kërkon ndalimin e sulmeve izraelite dhe tërheqjen e ushtrisë përpara zbatimit të planit, ndërsa disa vende arabe kanë kritikuar hapur Netanyahu-n për pengimin e përpjekjeve për paqe.
OKB-ja hap fondin prej 12 miliardë dollarësh për luftën kundër thatësirës: Toka po degradon, rrezikohet ushqimi
Ndërsa hemisfera veriore po përballet me temperatura ekstreme, zjarre dhe thatësira, OKB-ja nis këtë javë në Mongoli samitin për shkretëtirëzimin, ku do të diskutohet përdorimi i më shumë se 12 miliardë dollarëve për të ndihmuar vendet e prekura nga thatësira dhe degradimi i tokës.
Fondet synojnë projekte konkrete, si përmirësimi i sistemeve të ujitjes, përdorimi i kulturave më rezistente ndaj thatësirës dhe ruajtja më efikase e ujit për fermerët.
Samiti zhvillohet në një kohë kur dëmtimi i të korrave dhe mungesa e ujit po rrisin shqetësimet për çmimet e ushqimeve, ndërsa OKB-ja paralajmëron se miliona njerëz të tjerë mund të përballen me uri për shkak të kushteve ekstreme të motit.
