Zjarri i furishëm në jug të Francës lë mbi 100 të plagosur
Më shumë se 100 persona janë plagosur si pasojë e një zjarri të furishëm që po kërcënon qytetin jugor francez të Marsejës, sipas autoriteteve lokale.
Ministri i Brendshëm i Francës, Bruno Retailleau, tha se rreth 800 zjarrfikës janë në terren dhe do të punojnë “gjatë gjithë natës” për të vënë nën kontroll flakët.
Deri në mbrëmjen e së martës nuk është raportuar për viktima.
Kryetari i Bashkisë së Marsejës, Benoît Payan, deklaroi se shërbimet e emergjencës po zhvillojnë një “luftë guerile”. Ai tha se zjarri avanconte me shpejtësi 1.2 kilometra në minutë.
BE: Hungaria ende shumë larg për të zhbllokuar fondet e ngrira
Hungaria është ende larg zhbllokimit të 18 miliardë eurove në fonde të kohezionit dhe rimëkëmbjes që Bashkimi Evropian ka ngrirë për shkak të shqetësimeve të vazhdueshme për tkurrjes e demokracisë, thuhet në raportin e fundit për Sundimin e Ligjit të publikuar të martën nga Komisioni Europian.
Sipas raportit, Hungaria nuk ka bërë "asnjë përparim" në shtatë nga tetë rekomandimet e vitit të kaluar, që përfshijnë rregullimin e ligjeve për lobimin, luftën kundër korrupsionit të nivelit të lartë dhe garantimin e pavarësisë editoriale të mediave publike.
Gjykata Penale Ndërkombëtare lëshon urdhër-arreste për liderët e Talebanëve
Gjykata Penale Ndërkombëtare (GJPN) ka lëshuar urdhër-arreste për udhëheqësin suprem të Talebanëve dhe kreun e Gjykatës së Lartë të Afganistanit, për akuza për përndjekje të grave dhe vajzave në vend.
Urdhër-arrestet, të lëshuara të martën, i akuzojnë liderët për “urdhërim dhe nxitje të drejtpërdrejtë të një krimi kundër njerëzimit, përndjekje mbi bazë gjinore, që prej marrjes së pushtetit katër vjet më parë.”
Dy të pandehurit janë udhëheqësi suprem i Talebanëve, Hibatullah Akhunzada, dhe kreu i Gjykatës së Lartë, Abdul Hakim Haqqani.
Përveç përndjekjes së grave dhe vajzave, GJPN i akuzon ata edhe për përndjekje të personave të tjerë, për shkak të shprehjeve të seksualitetit apo identitetit gjinor që konsideroheshin të papajtueshme me politikat e Talebanëve për gjininë.
Mbi 160 persona ende të zhdukur në Teksas pas përmbytjeve vdekjeprurëse
Më shumë se 160 persona konsiderohen ende të zhdukur në Teksas pas përmbytjeve të befasishme gjatë fundjavës që shkaktuan mbi 100 viktima, tha guvernatori i shtetit të martën.
Numri i të zhdukurve është trefishuar pasi autoritetet vendore hapën një linjë telefonike ku familjarët mund të raportonin të afërmit e tyre të zhdukur.
Sipas guvernatorit Greg Abbott, shumë nga personat e zhdukur ka të ngjarë të kenë qenë të strehuar në zonën kodrinore të Teksasit, pa u regjistruar zyrtarisht në ndonjë kamp apo hotel. Ai theksoi se shumica e rasteve janë raportuar në qarkun Kerr, ku gjithashtu janë gjetur edhe pjesa më e madhe e viktimave.
