Ish-presidenti i Koresë së Jugut, Yoon Suk Yeol, rikthehet në burg
Gjykata e Seulit ka vendosur të rikthejë në burg ish-Presidentin e Koresë së Jugut, Yoon Suk Yeol, në kuadër të një hetimi lidhur me shpalljen e gjendjes së jashtëzakonshme më 3 dhjetor 2024.
Sipas agjencisë Reuters, ndaj tij është lëshuar një urdhër për riarrestim, ndërkohë që procesi gjyqësor po zgjeron përmasat politike dhe ligjore të çështjes.
Më 6 qershor, këshilltari special Cho Eun-seok, i cili po udhëheq hetimet për incidentin e gjendjes ushtarake, lëshoi një urdhër arresti për Yoon, duke e akuzuar atë për keqpërdorim të kompetencave presidenciale dhe shkelje të kushtetutës. Rasti ka ngritur pikëpyetje të forta mbi rolin e institucioneve në ruajtjen e balancës së pushteteve në vend.
Mark Rutte: “Europa nuk po prodhon mjaftueshëm armë”
Kancelari gjerman Friedrich Merz priti të mërkurën në Berlin Sekretarin e Përgjithshëm të NATO-s, Mark Rutte, në kuadër të 70-vjetorit të anëtarësimit të Gjermanisë në Aleancën e Atlantikut të Veriut.
Rutte theksoi se Europa nuk po prodhon mjaftueshëm pajisje ushtarake, duke përshëndetur rritjen e buxheteve të mbrojtjes në disa prej vendeve anëtare.
“Problemi nuk është as SHBA-ja dhe as Europa. Problemi është se ne nuk po prodhojmë sa duhet. Po përmirësohemi, por për momentin, Polonia, Rumania dhe Estonia po blejnë nga Koreja e Jugut, sepse në Evropë dhe SHBA proceset janë shumë të ngadalta. Prandaj duhet të rrisim kapacitetet tona së bashku,” deklaroi Rutte.
Ndërkohë, në sfondin e tensioneve mes Francës dhe Gjermanisë për projektin e avionëve luftarakë, Merz theksoi se bisedimet po vazhdojnë dhe se bashkëpunimi me Francën dhe Spanjën mund të sjellë rezultate pozitive, nëse arrihet një marrëveshje.
Zelensky dhe Papa Leo XIV diskutojnë për paqen në Ukrainë
Presidenti i Ukrainës, Volodymyr Zelensky, dhe Papa Leo XIV u takuan të mërkurën në rezidencën verore të Papës në Castel Gandolfo, ku diskutuan mundësinë që Vatikani të shërbejë si vend pritës për bisedimet e paqes për t’i dhënë fund pushtimit të plotë të Rusisë.
Takimi u zhvillua një ditë para Konferencës së Katërt për Rimëkëmbjen e Ukrainës, që do të mbahet të enjten dhe të premten në Romë.
Sipas deklaratës zyrtare nga Selia e Shenjtë, Papa Leo XIV dhe Zelensky folën për nevojën urgjente për një “paqë të drejtë dhe të qëndrueshme”.
Gjykata Europiane: Rusia ka shkelur të drejtën ndërkombëtare në Ukrainë
Gjykatësit e Gjykatës Europiane për të Drejtat e Njeriut në Strasburg dhanë të mërkurën një vendim historik, duke deklaruar se Rusia ka shkelur të drejtën ndërkombëtare në territorin ukrainas. Ky është rasti i parë kur një gjykatë ndërkombëtare e shpall zyrtarisht Kremlinin përgjegjës për abuzime me të drejtat e njeriut që nga fillimi i pushtimit në shkallë të gjerë në vitin 2022.
Gjykata gjithashtu e shpalli Rusinë përgjegjëse për rrëzimin e avionit të kompanisë Malaysia Airlines, fluturimi MH17, në vitin 2014, një tragjedi që mori jetën e 298 personave.
Ky vendim është i pavarur nga procesi penal në Holandë, ku dy shtetas rusë dhe një rebel ukrainas u dënuan në mungesë për vrasje të shumëfishta lidhur me rrëzimin e avionit. Vendimi i Strasburgut pritet të ketë ndikim të madh në përpjekjet ndërkombëtare për mbajtjen e Rusisë përgjegjëse për agresionin ndaj Ukrainës.
