Raundi i ri i bisedimeve për paqe midis Rusisë dhe Ukrainës do të zhvillohet të mërkurën
Presidenti i Ukrainës, Volodymyr Zelensky, deklaroi të hënën mbrëma se të mërkurën do të zhvillohet një tjetër raund bisedimesh mes Ukrainës dhe Rusisë në Turqi.
“Sot diskutova me Rustem Umerov për përgatitjet e shkëmbimit të të burgosurve dhe për takimin e radhës me palën ruse. Umerov më raportoi se takimi është planifikuar për të mërkurën,” tha Zelensky.
Ai shtoi se më shumë detaje do të bëhen publike ditën e martë.
Dy raundet e mëparshme të negociatave kanë sjellë shkëmbime të mëdha të të burgosurve, por nuk kanë prodhuar ndonjë hap konkret drejt përfundimit të agresionit rus, i cili ka hyrë në vitin e katërt.
25 shtete kërkojnë përfundimin e luftës në Gaza dhe thirrje për respektimin e ligjit ndërkombëtar
Një grup prej 25 shtetesh, përfshirë Francën, Belgjikën dhe Mbretërinë e Bashkuar, publikuan një deklaratë të përbashkët të hënën duke kërkuar përfundimin e menjëhershëm të luftës në Gaza dhe duke i bërë thirrje Izraelit të respektojë ligjin ndërkombëtar humanitar.
“Vuajtja e civilëve në Gaza ka arritur përmasa të reja,” thuhet në deklaratën e ministrave të jashtëm, të cilët dënuan “shpërndarjen e ngadaltë të ndihmave humanitare dhe vrasjet çnjerëzore të civilëve, përfshirë fëmijët, që përpiqen të sigurojnë nevojat bazë si uji dhe ushqimi.”
Modeli i shpërndarjes së ndihmave i ndjekur nga qeveria izraelite “është i rrezikshëm, nxit pasiguri dhe i mohon popullit të Gazës dinjitetin njerëzor,” thuhet në deklaratë.
Sipas tyre, “refuzimi nga ana e Izraelit për të garantuar ndihmën e domosdoshme humanitare për popullsinë civile është i papranueshëm.”
Një nga zbulimet më të mëdha të naftës në dekadën e fundit në Poloni
Një nga zbulimet më të rëndësishme të naftës konvencionale në dhjetë vitet e fundit është bërë në bregun e Detit Baltik në Poloni, afër qytetit portual ?ëinouj?cie.
Zbulimi ndodhi në pusin Wolin East 1 (WE1), vetëm 6 kilometra larg qytetit. Sipas të dhënave paraprake, pusi përmban rreth 22 milionë tonë naftë dhe kondensat, si dhe 5 miliardë metra kub gaz natyror të cilësisë komerciale.
Zona e gjerë e koncesionit, që shtrihet në 593 kilometra katrorë, vlerësohet të përmbajë mbi 33 milionë tonë naftë dhe kondensat, si dhe 27 miliardë metra kub gaz.
Avion ushtarak bie mbi shkollë, vdesin të paktën 20 persona
Një avion trajnimi i Forcave Ajrore të Bangladeshit u rrëzua mbi një shkollë në kryeqytetin Dhaka të hënën pasdite, pak pas ngritjes, duke shkaktuar vdekjen e pilotit dhe të paktën 19 personave të tjerë, shumica nxënës, njoftuan autoritetet.
Një total prej 171 nxënësish u shpëtuan me plagë nga godina dykatëshe që mori flakë. Shumë prej tyre, të djegur ose të lënduar rëndë, u transportuan me helikopterë drejt spitalit.
Avioni kinez F-7 BGI pësoi një “defekt teknik” menjëherë pas ngritjes nga baza ajrore. Piloti u përpoq të devijonte avionin drejt një zone më pak të populluar përpara se të përplasej në kompleksin e shkollës, thuhet në një deklaratë të ushtrisë.
