Trump dhe Zelensky takohen në Uashington
Presidenti amerikan, Donald Trump, e quajti të hënën një "ditë të madhe", teksa presidenti ukrainas, Volodymyr Zelensky dhe aleatët europianë mbërritën në kryeqytetin amerikan për një takim të rëndësishëm mbi përfundimin e luftës së Rusisë në Ukrainë.
Këto bisedime në Uashington vijnë pas një samiti që Trump mbajti me presidentin rus, Vladimir Putin, në Alaskë të premten e kaluar.
Pas takimit me Putinin, Trump bëri të ditur se negociatat për një armëpushim të mundshëm janë lënë mënjanë për të kërkuar një marrëveshje të shpejtë paqeje, ndërsa lufta e Rusisë vazhdon në vitin e saj të katërt.
Megjithatë, kjo ka ngritur shqetësime për lëshime të mundshme të Ukrainës ndaj Rusisë, e cila besohet se ka ripërsëritur kërkesat e saj maksimale, duke përfshirë kontrollin e plotë mbi katër rajone ukrainase (Donetsk, Luhansk, Zaporizhzhia dhe Kherson), si dhe mbajtjen e Krimesë së aneksuar.
Hamasi pranon propozimin më të fundit për armëpushim në Gaza
Të hënën, Hamasi u ka bërë të ditur ndërmjetësve se është dakord me propozimin më të fundit për armëpushim në Rripin e Gazës, sipas burimeve ndërkombëtare dhe izraelite që citojnë zyrtarë të Hamasit.
Zyrtarët nuk dhanë më shumë detaje për momentin.
Mediat izraelite raportojnë se propozimi iu paraqit grupit militant një ditë më parë dhe përbën një version të rishikuar të përgjigjes së fundit të Hamasit, që përfshin një marrëveshje kuadër për një armëpushim 60-ditor dhe një proces në dy faza për lirimin e pengjeve që ndodhen ende në duart e Hamasit.
Ndërkohë, ndërmjetësit egjiptianë dhe nga Katari po vazhdojnë përpjekjet për të ndërmjetësuar një marrëveshje armëpushimi mes Izraelit dhe Hamasit në Gaza.
Liderët europianë shfaqin shpresë pas takimit me Trump
Pas bisedimeve në Shtëpinë e Bardhë, liderët europianë u shprehën optimistë se presidenti amerikan, Donald Trump, mund të jetë duke fituar terren në përmbushjen e premtimit të tij elektoral për t’i dhënë fund pushtimit rus të Ukrainës.
Në takim morën pjesë udhëheqësit e Francës, Gjermanisë, Finlandës, Italisë dhe Mbretërisë së Bashkuar, si dhe presidentja e Komisionit Evropian, Ursula Von Der Leyen dhe sekretari i përgjithshëm i NATO-s, Mark Rutte. Ata shfaqën një front të bashkuar në diskutimet me Trump dhe presidentin ukrainas.
Kryeministri britanik Keir Starmer tha pas takimit se kishte “progres të vërtetë” dhe një “ndjenjë reale uniteti”.
Presidentja e Komisionit Europian, Ursula Von Der Leyen, theksoi se të gjitha palët po punojnë së bashku për “një paqe të qëndrueshme dhe afatgjatë”.
Spanja dërgon 500 trupa shtesë për të luftuar zjarret pyjore mes valës rekord të të nxehtit
Kryeministri spanjoll, Pedro Sánchez, njoftoi se 500 ushtarë të tjerë do të jenë në gatishmëri për të ndihmuar në luftimin e zjarreve që kanë përfshirë zonat pyjore të thata për shkak të valës ekstreme të të nxehtit që ka përfshirë Evropën.
Vendimi për të shtuar forcat ushtarake i çon në mbi 1,400 numrin total të trupave të angazhuara në përballimin e zjarreve, veçanërisht në rajonin veriperëndimor të Galicisë, ku autoritetet janë në pritje të ndihmës nga avionë zjarrfikës të premtuar nga vende të tjera europiane.
Sipas presidentit të qeverisë rajonale të Galicisë, Alfonso Rueda, aktualisht po përballen me 12 vatra të rrezikshme zjarri në provincën e Ourens.
Temperaturat në Spanjë mund të arrijnë deri në 45°C në disa zona të dielën, sipas agjencisë kombëtare të motit, AEMET. Të shtunën, temperatura më e lartë e regjistruar ishte 44.7°C në qytetin jugor të Cordobës.
