Izraeli po përgatitet për një ofensivë të zgjeruar ushtarake në Gaza
Izraeli ka njoftuar se do të nisë një fazë të re të ofensivës ushtarake në Gaza dhe se do të aktivizojë 60,000 rezervistë shtesë, ndërkohë që negociatorët po përpiqen të arrijnë një armëpushim për t’i dhënë fund luftës 22-mujore mes Izraelit dhe Hamasit.
Forcat Mbrojtëse të Izraelit (IDF) deklaruan të mërkurën se Ministri i Mbrojtjes, Israel Katz, ka miratuar planet për të nisur operacione të reja në një nga zonat më të populluara të Gazës.
Kjo ndodh në një kohë kur organizatat për të drejtat e njeriut paralajmërojnë se kriza humanitare në Rripin e Gazës mund të përkeqësohet më tej, pasi shumica e banorëve janë zhvendosur, lagje të tëra janë shkatërruar dhe komunitetet përballen me kërcënimin e urisë.
Droni rus rrëzohet në Poloni
Një dron ushtarak që u rrëzua dhe shpërtheu në një arë misri në lindje të Polonisë herët të mërkurën ishte rus, ka deklaruar ministri polak i Mbrojtjes.
Policia tha se ngjarja ndodhi rreth orës 2 të mëngjesit dhe pjesë të djegura metali dhe plastike u gjetën pranë fshatit Osiny.
Si pasojë e shpërthimit, disa dritare shtëpish u thyen, por nuk pati të lënduar.
Shiu dhe lagështia ndihmojnë në përballimin e zjarreve në Spanjë
Moti i lagësht dhe reshjet e shiut kanë sjellë lehtësim për autoritetet spanjolle në përballjen me zjarret që kanë përfshirë vendin prej javësh. Deri më tani, mbi 391,000 hektarë pyje janë djegur, sipas të dhënave të Sistemit Europian të Informacionit për Zjarret në Pyje.
Edhe pse 40 vatra zjarri janë ende aktive, reshjet e fundit, veçanërisht në provincën León, mund të ndihmojnë zjarrfikësit të vënë situatën nën kontroll dhe t’u japin mundësi autoriteteve të përqendrojnë përpjekjet në zona të tjera.
Të mërkurën, autoriteten njoftuan se përpjekjet për shuarjen e zjarreve po ecin mirë, falë përmirësimit të kushteve atmosferike.
Një i vdekur dhe 19 të plagosur pas gjetjes së një barke me emigrantë pranë Mallorca-s
Të paktën një person ka humbur jetën dhe 19 të tjerë janë plagosur pasi një barkë me emigrantë nga Afrika e Veriut u gjet në jug të ishullit spanjoll Mallorca, pas gati një jave lundrimi në det.
Bluzat e bardha i dhanë ndihmën e parë 18 personave, ndërsa tre prej tyre u transportuan në spital në gjendje të rëndë.
Anija u zbulua më shumë se katër kilometra larg bregut jugor të Mallorcas, pasi një varkë private shpëtoi një emigrant nga Afrika Sub-Sahariane, i cili njoftoi autoritetet për barkën me të cilën kishte qenë.
Më pas, u organizua një operacion ajror dhe detar, ku u gjetën 11 emigrantë ende në bord dhe një trup i pajetë. Shtatë persona të tjerë u shpëtuan nga deti në afërsi të vendngjarjes.
