Brazil/ Arrestohet ish-presidenti

Jair Bolsonaro, ish-presidenti i Brazilit, u arrestua nga autoritetet në vilën e tij në Brasilia, sipas një urdhri nga Gjykata e Lartë Federale. Mbështetësit e tij kishin planifikuar të organizonin një “vigjilje” jashtë apartamentit luksoz ku Bolsonaro jetonte në arrest shtëpie, që prej gushtit të këtij viti. Festa ishte kërkuar nga djali i tij, Flavio.

Bolsonaro u dënua në shtator me 27 vjet e 3 muaj burg, për orkestrimin e një grushti shteti për të parandaluar Luiz Inacio Lula da Silva, fituesin e zgjedhjeve të vitit 2022, që të merrte pushtetin.

Gaza/ Izraeli vijon sulmet; vret 21 palestinezë

Sulmet ajrore izraelite kanë rifilluar në Gaza, duke shktatuar 21 viktima. Ushtria izraelite ka nisur sërish me bombardimet, qysh prej të mërkurës së kësaj jave, ndonëse kishin rënë dakord për një armëpushim, sipas planit të prezantuar nga SHBA. Si Hamasi, ashtu edhe Izraeli, akuzojnë njëri-tjetrin për shkelje të armëpushimit.

Izraeli njoftoi se kishte goditur objektivat e Hamasit në shenjë hakmarrjeje dhe më tej, Benjamin Netanyahu, u shpreh se ishin vrarë 5 persona të rëndësishëm në radhët e Hamasit.

Ukraina i kundërpërgjigjet Moskës

Ukraina ka goditur një termocentral të rëndësishëm në zonën e Moskës. Sulmi u krye me dronë pa pilot dhe pasojet e sulmit ishin të mëdha. Termocentrali “Shatura” ndodhet 120 km në lindje të Moskës dhe shkaktoi panik në zonë.

Andrey Vorobyov, guvernatori i Moskës, bëri me dije se disa nga dronët u shkatërruan dhe më tej, zjarri u vendos nën kontroll. Ukraina bëri sulme të ngjashme në territorin rus më 22 nëntor, duke cekur zona strategjike dhe infrastrukturën ruse.

Maqedonia e Veriut/ Nis gjyqi ndaj 35 personave për masakrën e Koçanit

Ka nisur gjyqi për tragjedinë e klubit të natës në Koçan. Nga zjarri i madh humbën jetën 63 persona, shumica të rinj dhe u lënduan thuajse 200 të tjerë. Seanca dëgjimore do të mbahet në Shkup, në sallën e gjyqit të burgut të Isdrovës, me masa shumë të rrepta sigurie.

Në gjyq do të shpallet vendimi për 35 persona, me aktakuza të ndryshme, që nga shkelja e detyrës, certifikatave të rreme dhe vrasje të paqëllimshme. Mes të akuzuarve janë edhe pronari i klubit, 2 ish-ministra të Ekonomisë, 3 ish-kryetarë bashkie, si dhe disa zyrtarë të shtetit.