Bullgaria përgatitet të bashkohet me eurozonën
Bullgaria po përgatitet të adoptojë monedhën euro në janar, në një kohë të shënuar nga tensione të reja politike të brendshme dhe shqetësime se fushatat e keqinformimit, të lidhura me Rusinë, po thellojnë mosbesimin ndaj monedhës së re.
Vendi ballkanik me rreth 6.5 milionë banorë pritet të bëhet shteti i 21-të që i bashkohet Eurozonës më 1 janar. Zyrtarët në Bruksel dhe Sofje shpresojnë se ky hap do të ndihmojë në forcimin e ekonomisë së vendit, i cili konsiderohet më i varfri në Bashkimin Europian, si dhe në konsolidimin e orientimit të tij pro-perëndimor.
Presidentja e Komisionit Evropian, Ursula von der Leyen, është shprehur se “falë euros”, Bullgaria do të përfitojë më shumë tregti, më shumë investime dhe më shumë vende pune cilësore, si edhe rritje të të ardhurave reale.
Polonia po planifikon fortifikime kundër dronëve përgjatë kufirit lindor me Rusinë
Polonia po përgatitet të ndërtojë fortifikime të reja kundër dronëve përgjatë kufijve të saj lindorë, në kuadër të shqetësimeve në rritje për kërcënimet nga Rusia. Projekti, me vlerë rreth 2 miliardë euro, pritet të përfundojë brenda dy viteve.
Vendimi vjen pas shfaqjeve fë mjeteve ajrore luftarake pa pilot nga Rusia në hapësirën ajrore polake më herët gjatë këtij viti. Zëvendësministri i Mbrojtjes, Cezary Tomczyk, deklaroi se kapacitetet e para të sistemit të ri të mbrojtjes pritet të jenë funksionale brenda rreth gjashtë muajve, ndërsa sistemi i plotë do të përfundojë brenda 24 muajve.
Autoritetet polake e shohin këtë projekt si pjesë të përforcimit të sigurisë kombëtare dhe të mbrojtjes së kufijve lindorë, pas rritjes së tensioneve gjeopolitike në rajon dhe të kërcënimeve nga Rusia.
Zelensky udhëton drejt Floridës për bisedime me Trump, ndërsa Kievi përballet me sulme të reja
Kievi është përballur me një valë të re sulmesh ajrore nga Rusia, duke lënë rreth një të tretën e qytetit pa ngrohje, pasi dronët dhe raketat goditën furnizimin me energji elektrike. Qindra mijëra banorë po përballen me temperatura të ulëta në kulmin e dimrit.
Presidenti i Ukrainës, Volodymyr Zelenskyy, deklaroi se gjatë sulmit janë përdorur rreth 500 dronë dhe 40 raketa, përfshirë edhe raketa balistike. Sipas tij, objektivi kryesor ka qenë kryeqyteti, me goditje ndaj infrastrukturës energjetike dhe asaj civile.
Ngjarjet ndodhën në të njëjtën kohë kur Zelenskyy u nis drejt Floridës për një takim ballë për ballë me presidentin amerikan, Donald Trump, i cili ka propozuar një plan për t’i dhënë fund luftës që ka hyrë në vitin e katërt dhe ka shkaktuar dhjetëra mijëra viktima.
Policia italiane arreston nëntë persona dhe sekuestron mbi 8 milionë euro në një hetim për financimin e Hamasit
Italia ka arrestuar nëntë persona të dyshuar për financimin e grupit Hamas përmes shoqatave bamirëse, në kuadër të një operacioni të gjerë kundër terrorizmit. Gjatë aksionit, autoritetet sekuestruan më shumë se 8 milionë euro në asete.
Sipas hetuesve, fondet e mbledhura, që arrinin të paktën 7.3 milionë euro, janë përdorur për të mbështetur strukturat e Hamasit, përfshirë ndihmën për familjet e personave të përfshirë në sulme kamikaze ose të burgosur për vepra terroriste. Prokurorët kanë deklaruar se kjo mbështetje financiare ka forcuar kapacitetin operativ të organizatës.
Hetimi kishte nisur përpara sulmit të udhëhequr nga Hamasi më 7 tetor 2023 në Izraelin jugor dhe, sipas prokurorisë, ka zbuluar një rrjet kompleks transferimesh financiare ndërkombëtare.
