Hormuzi mbete i bllokuar, shtohen tensionet SHBA- Iran
Ngushtica strategjike e Hormuzit mbeti e mbyllur, në mes të përplasjes së vazhdueshme mes Iranit dhe SHBA-së.
Autoritetet iraniane sinjalizuan se një marrëveshje paqeje mbetet ende e largët, pavarësisht disa përparimeve në negociata.
Përpjekjet ndërmjetësuese vijuan pas bisedimeve të nivelit të lartë në Pakistan, të cilat nuk arritën një marrëveshje konkrete. Teherani deklaroi se nuk do të rihapë këtë rrugë kyçe tregtare derisa SHBA të heqë bllokadën ndaj porteve iraniane.
Komisioni Europian hap rrugën për fondet: Marrëveshje me qeverinë e re hungareze
Komisioni Europian ka rënë dakord të bashkëpunojë me qeverinë e ardhshme të Hungarisë për të zhbllokuar fondet e ngrira evropiane.
Kryeministri i ri, Péter Magyar, njoftoi se ka pasur progres pas bisedimeve të zhvilluara gjatë fundjavës. Një delegacion i nivelit të lartë nga Brukseli udhëtoi në Budapest për negociata intensive dyditore.
Bisedimet synojnë zhbllokimin e miliardave eurove përpara afatit që përfundon në gusht.
Pedro Sánchez sfidon të djathtën globale në një samit në Barcelonë
Kryeministri spanjoll Pedro Sánchez mblodhi liderë ndërkombëtarë në Barcelonë në një samit dyditor të quajtur “CPAC progresiv”.
Në fjalimin e tij, ai paralajmëroi për një “valë reaksionare” që, sipas tij, nxit përçarje dhe konflikte. Pa përmendur drejtpërdrejt Donald Trump, ai kritikoi retorikën e së djathtës ekstreme.
Sánchez deklaroi se kjo periudhë politike është drejt fundit, pavarësisht zhurmës dhe dezinformimit.
Donald Trump lehtëson rregullat për kërkimin mbi drogat psikedelike
Presidenti amerikan Donald Trump njoftoi lehtësimin e kufizimeve për kërkimet mbi drogat psikedelike, si “kërpudhat magjike”. Vendimi synon të ndihmojë studimet mbi trajtimin e problemeve të shëndetit mendor.
Në prani të Robert F. Kennedy Jr. dhe figurave të tjera publike si Joe Rogan, ai firmosi një urdhër ekzekutiv për të përshpejtuar proceset kërkimore.
Urdhri parashikon reduktimin e burokracisë dhe përmirësimin e shkëmbimit të të dhënave mes institucioneve.
Vendimi pritet të hapë rrugë për zhvillime të reja në trajtimin e shëndetit mendor.
