Samiti i BE-së me udhëheqësit e Ballkanit Perëndimor për të riafirmuar perspektivat e anëtarësimit
Më shumë se 30 liderë europianë u mblodhën në Tivat të Malit të Zi për t’u dhënë gjashtë vendeve të Ballkanit Perëndimor, përfshirë Shqipërinë, sinjalin se anëtarësimi në BE mbetet një objektiv real dhe strategjik.
Samiti fokusohet tek afrimi gradual i këtyre vendeve me tregun e përbashkët europian, ndërsa Mali i Zi dhe Shqipëria konsiderohen kandidatët më të avancuar në rrugën drejt anëtarësimit.
Takimi zhvillohet mes shqetësimeve për ndikimin në rritje të Rusisë dhe Kinës në rajon, si edhe debatit brenda BE-së për zgjerimin e ardhshëm të bllokut.
Zelensky bën thirrje për negociata ballë për ballë për luftën në Ukrainë në një letër drejtuar Putin-it
Zelensky i ka dërguar një letër publike Putin-it, ku i propozon për herë të parë që nga nisja e pushtimit rus në vitin 2022 një takim ballë për ballë në një vend neutral si Zvicra, Turqia ose një shtet arab për të diskutuar fundin e luftës.
Zelensky deklaroi se Ukraina është e gatshme për armëpushim të plotë gjatë negociatave dhe propozoi shkëmbimin e të gjithë të burgosurve të luftës, ndërsa akuzoi Rusinë se po planifikon ta zgjasë konfliktin deri në vitet 2027–2028.
Ndërkohë, Donald Trump e mbështeti idenë e një takimi mes dy liderëve dhe tha se të dyja palët do të duhet të bëjnë kompromise, ndërsa Putin-i deklaroi se Rusia mbetet e hapur për një marrëveshje, por po forcon mbrojtjen ajrore pas sulmeve të fundit ukrainase me dronë.
Inteligjenca artificiale mund t’ua lehtësojë krijimin e armëve biologjike personave të rrezikshëm
Drejtuesit e kompanive të mëdha të inteligjencës artificiale, përfshirë OpenAI, Google DeepMind dhe Microsoft AI, po kërkojnë ligje më të forta për kontrollin e blerjeve të ADN-së sintetike, nga frika se teknologjia mund të përdoret për krijimin e armëve biologjike.
Ekspertët paralajmërojnë se zhvillimi i shpejtë i inteligjencës artificiale po ul pengesat teknike që deri tani e kanë bërë të vështirë krijimin e patogjenëve të rrezikshëm nga aktorë keqdashës.
Ndërkohë, edhe Bashkimi Europian po shqyrton rregulla të reja për verifikimin e klientëve dhe monitorimin e porosive të dyshimta në sektorin e bioteknologjisë.
Disney grumbullon një deficit prej 4.2 miliardë dollarësh në parqet e Parisit
Edhe pse tërheq rreth 16 milionë vizitorë në vit dhe ka regjistruar të ardhurat më të larta në historinë e tij, parku argëtues Disneyland Paris ende nuk i ka kthyer kompanisë mëmë Disney rreth 4.2 miliardë dollarë nga investimi total i bërë gjatë 34 viteve të fundit.
Resorti është përballur ndër vite me borxhe të mëdha, recesione ekonomike, sulmet terroriste në Paris dhe pandeminë, faktorë që e kanë mbajtur për shumë kohë në humbje pavarësisht popullaritetit të tij.
Sipas analizës së dokumenteve financiare, Disney ka investuar rreth 6.8 miliardë dollarë në park që prej hapjes në vitin 1992, por fitimet nga dividentët, tarifat e menaxhimit dhe të drejtat e përdorimit të personazheve nuk kanë mjaftuar ende për të rikuperuar shumën e investuar.
