Martesa për para po romantizohet në TikTok, por ky rrëfim zbulon çmimin e vërtetë

TikTok po promovon gjithnjë e më shumë idenë e të ashtuquajturit "provider husband", ose partnerit që siguron financiarisht familjen. Sipas këtij trendi, gratë inkurajohen të kërkojnë një burrë të pasur, i cili mund t'u ofrojë siguri ekonomike dhe një jetë pa stres financiar, madje edhe mundësinë për të mos punuar fare.

Ky fenomen është bërë viral në platformë dhe po tërheq gra të moshave, profesioneve dhe prejardhjeve të ndryshme. Për shumë prej tyre, nuk bëhet fjalë për luks, por për një ndjenjë sigurie në një kohë kur kostoja e jetesës është gjithnjë e më e lartë.

Një nga zërat më të njohur të këtij trendi është Sarah Khorramnezhad, e njohur në TikTok si @SisTalksWithSahar. Ajo tregon se dikur kishte një pozicion të rëndësishëm në një studio ligjore në New York, por partneri i saj e nxiti të largohej nga puna, pasi e shihte të pakënaqur. Për tetë muaj ajo nuk punoi, nisi studimet për master dhe krijoi një profil në TikTok, i cili u kthye në një sukses. Edhe pse shpesh është etiketuar si "gjuetare pasurie", ajo këmbëngul se zgjedhja e saj nuk kishte të bënte vetëm me paratë.

"“Partneri im e shihte që isha e palumtur dhe ma thoshte këtë. Ai më inkurajoi të lija punën dhe më tha: ‘Merr pak kohë për të zbuluar se çfarë të pëlqen’."

Një histori e ngjashme është ajo e Elias, e cila u martua në moshën 22-vjeçare me një ushtarak që kishte të ardhura të mira. Ajo pranon se stabiliteti financiar ishte një nga arsyet kryesore të vendimit të saj. Sot, ajo ka mbi një milion ndjekës në TikTok, ku ndan këshilla për marrëdhëniet dhe jetën në çift.

"E vetmja arsye pse ai u martua me mua është sepse isha seksi. E vetmja arsye pse u martova me të është sepse ai kishte para", shkroi ajo në postimin e saj në Reddit. "Në fakt, unë kam edhe cilësi të tjera tërheqëse, por ai u martua me mua sepse isha shumë e bukur. E di këtë. Të gjithë e dinë këtë."

Por jo të gjitha historitë përfundojnë me të njëjtin optimizëm. Në Reddit, një grua ndau në mënyrë anonime përvojën e saj, duke rrëfyer se u martua me një burrë 40-vjeçar kur ishte vetëm 19 vjeçe, kryesisht për shkak të pasurisë së tij. Pas 20 vitesh martesë dhe katër fëmijëve, ajo thotë se, nëse do të mund ta kthente kohën pas, nuk do ta merrte më të njëjtin vendim.

Sipas saj, martesa për para ka një kosto që nuk matet me para. Ajo shprehet se, kur një partner kontrollon financat, shpesh krijohet edhe një raport i pabarabartë pushteti.

"Ai kurrë nuk do ta thotë me zë të lartë. Por ti e di mirë si është realiteti. Në thelb i pabarabartë. Ai do ta prishë hierarkinë në momentet më të rëndësishme dhe do të të bëjë të ndihesh sikur po të shembet bota nën këmbë. Vajza ime e madhe është dy vjet më e vogël se unë kur takova burrin tim dhe nuk mund ta imagjinoj këtë lloj jete për të."

Psikologët dhe ekspertët e marrëdhënieve theksojnë se është normale të kërkosh stabilitet ekonomik te një partner, por paralajmërojnë se varësia financiare mund të sjellë pasoja afatgjata për pavarësinë personale. Në fund, zgjedhja e partnerit nuk ka të bëjë vetëm me sigurinë ekonomike, por edhe me balancën, respektin dhe mundësinë për të ruajtur autonominë në një marrëdhënie.