Disa gjëra Miley Cyrus nuk i ka lënë pas, sidomos kur bëhet fjalë për ish-in, aktorin Liam Hemsworth. Në një intervistë për Vogue, Miley foli për modën e çdo periudhe, e cila simbolizon një evolucion të vërtetë në jetën e saj dhe zbuloi se ende ka rroba që nga marrëdhënia me Liam-in.
“Kam një fustan që e vesha kur takova ish-burrin tim dhe pastaj kam fustanin që vesha në takimin tonë të parë. Përveç letrave dhe gjërave të tjera, unë me të vërtetë dua të shijoj këto momente të bukura të jetës sime, por duke qenë se këto momente intime kanë qenë gjithashtu momente publike, është pak e vështirë të vendos se çfarë do të ndaj dhe çfarë kurrë nuk do të lejoj të shihet.”
Këngëtarja 32-vjeçare i gjeti këto sende sentimentale ndërsa ishte "zhytur thellë në organizimin" e arkivave të jetës së saj, duke "krijuar një raft për trashëgiminë, që është një përzgjedhje e disa pamjeve nga çdo periudhë”, të cilën ajo do të donte ta rikujtonte, duke vijuar se në fakt, këto veshje tregojnë një zhvillim të vërtetë për të.
Sigurisht, kjo s’është hera e parë që Miley e përmend Liam, madje, njerëzit kanë aluduar se shumë këngë të saj i janë dedikuar pikërisht aktorit, i cili me thënë të drejtën, s’është se ka bërë ndonjë reagim publik, as nuk ka folur për ish-in në ndonjë intervistë.
Miley dhe Liam u takuan në vitin 2009 në setin e “The Last Song” dhe pak pas përfundimit të xhirimeve, të dy konfirmuan romancën e tyre. Që atëherë, ata ishin në një marrëdhënie me ngritje e ulje deri në vitin 2012, kur Liam i propozoi Miley me një unazë 3.5 karatësh nga Neil Lane. Yjet anuluan fejesën e tyre në shtator 2013, pas shtyrjes së martesës në prill të po atij viti. Megjithatë, në 2016 u ribashkuan, rifilluan aty ku e lanë (me një unazë të re në gishtin e Cyrus) dhe u martuan në dhjetor 2018. Miley e konfirmoi lajmin në Instagram, me një foto ku të dy ishin duke u puthur në ditën e martesës.
Marrëdhënia e tyre mori fund në 2019-ën kur u ndanë.
"Ata kanë vendosur që kjo është më e mira. Të dy po përqendrohen te vetja dhe karrierat e tyre. Ata mbeten prindër të përkushtuar për të gjitha kafshët që ndajnë, duke shfrytëzuar këtë kohë për vete. Ju lutemi respektoni procesin dhe privatësinë e tyre", tha asokohe për People përfaqësuesi i Miley, ndërsa Liam konfirmoi lajmin në Instagram tre ditë më vonë.
Liam bëri kërkesën për divorc në gusht të vitit 2019, duke dhënë si argument “dallime të pakapërcyeshme”. Një burim i afërt me Miley-n u shpreh për People se këngëtarja nuk e priste që Liam të bënte kërkesën për divorc.
Më 28 janar të vitit 2020, dyshja u nda zyrtarisht.
Po atë vit, Miley dha një intervistë në podcastin “Joe Rogan Experience” dhe foli për divorcit publik, duke thënë se ishte “tmerrësisht i vështirë.”
“Ajo që ishte vërtet e vështirë nuk ishte fakti që unë dhe dikush që e doja kuptuam se nuk e donim më njëri-tjetrin si më parë. Kjo është në rregull. Mund ta pranoj. Nuk mund të pranoj demonizimin dhe të gjitha ato histori që pasuan”, u shpreh ajo.
Që nga ajo kohë, Miley është lidhur me të dashurin e saj, bateristin 26-vjeçar Maxx Morando, ndërsa Liam është fejuar së fundmi me modelen Gabriella Brooks.
