Një mesazh i shkruar nga Dolly Parton për fëmijët që përfundonin programin e saj të leximit po rikthehet në vëmendje pas vdekjes së këngëtares. Fjalët e saj, të cilat u drejtohen fëmijëve në një moment të rëndësishëm të jetës së tyre, po shpërndahen sërish në rrjetet sociale.
Mesazhi personal përfshihet në librin e fundit që fëmijët marrin nga Biblioteka e Imagjinatës, kur mbushin pesë vjeç. Gazetarja e Washington Post, Hannah Sampson, e publikoi letrën në rrjetet sociale, duke bërë që fjalët e Parton të marrin një vëmendje të re.
Në të, Parton kujton kohën kur fëmijët ishin ende foshnje dhe familjet e tyre nisën t'u lexonin libra. Ajo i inkurajon të mos ndalen së lexuari edhe pasi të përfundojë programi, duke u sugjeruar të vazhdojnë të vizitojnë bibliotekën publike.
“Çdo libër është një thesar dhe sa herë që hap një të tillë, do të takosh miq të rinj dhe do të udhëtosh në vende të mrekullueshme e magjike”, shkruan ajo.
Ndërsa fëmijët përgatiten për të nisur shkollën, Parton u kujton se mundësitë e tyre janë të pakufizuara. Ajo i nxit të ndjekin ëndrrat dhe të besojnë te vetja, duke u thënë se “nuk ka kufi për atë që mund të bësh ose sa larg mund të shkosh”.
Në fund të letrës, këngëtarja ndan edhe tre këshilla që thotë se i ka mësuar nga familja e saj:
“Ëndërro për gjëra të mëdha, mëso sa më shumë që të mundesh dhe kujdesu për të gjithë ata që kujdesen për ty.”
Mesazhi përfundon me një tjetër fjali karakteristike të Parton: “Mund të jesh kushdo që dëshiron të jesh.” Dhe më pas, një përshëndetje që e bën letrën edhe më personale: “Je e mrekullueshme dhe mos harro... Do të të dua gjithmonë, Dolly.”
Megjithëse mesazhi është bërë viral pas vdekjes së saj, ai nuk ishte shkruar posaçërisht për këtë moment. Të njëjtat fjalë u prezantuan edhe në një video të publikuar në vitin 2022.
Një program i lindur nga historia e familjes
Biblioteka e Imagjinatës u themelua nga Dolly Parton në vitin 1995, përmes Fondacionit Dollywood, me synimin për t'u afruar fëmijëve libra që në vitet e para të jetës. Programi dërgon libra falas, të përshtatshëm për moshën, për fëmijët nga lindja deri në moshën pesë vjeç, pavarësisht të ardhurave të familjes.
Ideja kishte një lidhje të drejtpërdrejtë me historinë e babait të saj, Robert Lee Parton, i cili nuk kishte mundur të mësonte të lexonte e të shkruante pasi e kishte lënë shkollën në moshë të vogël për të punuar.
“Gjithmonë ndihesha keq për babanë tim, prandaj e fillova programin, fillimisht vetëm për zonën tonë”, kishte treguar Parton në vitin 2022.
“Doja t'i ndihmoja fëmijët në vitet e para dhe më të rëndësishme të jetës së tyre të mësonin të lexonin dhe të shkruanin.”
Programi është rritur ndjeshëm që prej themelimit. Deri në vitin 2025, Biblioteka e Imagjinatës shpërndante më shumë se 3.4 milionë libra çdo muaj për fëmijët në SHBA dhe vende të tjera, ndërsa në total kishte dhuruar më shumë se 300 milionë libra.
Për Parton, kjo ishte një nga trashëgimitë e saj më të rëndësishme personale. Pas vdekjes së saj, familja kërkoi që, në vend të luleve, njerëzit të bënin donacione për Bibliotekën e Imagjinatës.
Edhe Taylor Swift dhe Travis Kelce kanë mbështetur programin, duke dhuruar 2 milionë dollarë në korrik.
Në fund, mesazhi i Parton për fëmijët mbetet më shumë se një letër për përfundimin e një programi leximi. Është një kujtesë për rëndësinë e librave, të dijes dhe të ëndrrave, por edhe një pjesë e vogël e trashëgimisë që ajo zgjodhi të ndërtonte për brezat e rinj.
