Ka kaq shumë lloje grupesh shoqërore: shoqet e brunch-it, miqtë e gjimnazit, grupi me tre persona në chat që ekziston vetëm për të dërguar video TikTok-u, por miqtë e ëndrrave janë ata të ngushtët, të cilët janë gjithnjë aty për ty!
Nëse je me fat, ky lloj grupi miqsh do të vijë natyrshëm, ose do t’i mbledhësh me kalimin e viteve, ose do të kesh fatin t’i gjesh të gjithë menjëherë. Megjithatë, nëse ke një nga këto shenja në grupin tënd, je i/e bekuar!
Luani
Të kesh një Luan në grupin tënd të miqve është si të kesh një person që të mbështet 100% dhe truprojë personale në një person të vetëm. Si shenjë e sunduar nga Dielli, Luani do t’i bëjë të gjithë të ndihen mirë dhe të ndiejnë se dikush po kujdeset për ta. Prandaj, do të të motivojë para një interviste pune dhe do të të kujtojë vlerën, pas një ndarjeje që të theu zemrën.
Meqë duan t’i bëjnë miqtë të ndihen të veçantë, një Luan do ta kthejë çdo rast në festë. Ai do të kujdeset që ditëlindja jote, arritjet në punë dhe çdo detaj tjetër të jetë një moment për të ngritur dolli!
Si shenjë Zjarri plot vetëbesim, mund t’i besosh, se e di mirë çfarë është më e mira për ty, ndaj do të ta thotë problemin troç, siç është! Nëse i shkon me një problem, do të të japë këshilla të sinqerta, me dashuri, por edhe me forcë.
Akrepi
Çdo grup i ngushtë miqsh ka nevojë për një Akrep. Si një nga shenjat më besnike të zodiakut, ai do të jetë aty për ty në çdo ngritje e rënie dhe do të të kuptojë edhe nëse largohesh për pak kohë. Kur të kesh nevojë, do të jetë aty, me krahët hapur.
Kjo shenjë Uji e udhëhequr nga Plutoni, me intuitë të thellë, e ndien saktësisht çfarë të duhet më shumë, ndaj është gati të të ofrojë qoftë një vesh që dëgjon, apo të të japë një këshillë të sinqertë. Nuk di ç’të bësh me karrierën? Akrepi do të ulet e do të të dëgjojë me orë të tëra derisa ta kuptosh vetë. Po mendon t’i shkruash ish-it? Është Akrepi ai që do të të marrë telefonin nga dora dhe do të të numërojë të gjitha arsyet pse kjo është një ide e tmerrshme, shoqëruar me shikimin më serioz që ke parë ndonjëherë.
Akrepi është gjithashtu gjykues i shkëlqyer të karakterit, gjë që e bën anëtar të pazëvendësueshëm të ekipit. Ai do ta ndiejë menjëherë kur nuk je vetvetja dhe do ta kuptojë në çast nëse po bën diçka për arsyet e gabuara.
Bricjapi
Bricjapi është mbreti/esha e orientimit në jetë. Meqë e ka gjithçka nën kontroll për veten e vet, i mbetet energji e mjaftueshme për të ndihmuar të tjerët. Si shenjë Toke e sunduar nga Saturni, planeti i strukturës dhe rregullave, mund t’i besosh se e di mirë se çfarë flet kur jep këshilla, apo kur të tregon drejt se çfarë duhet bërë.
Prandaj është njeriu më i mirë për t’u kontaktuar kur je në një situatë të vështirë. Makinë e prishur? Fluturim i humbur? Dikush nuk të erdhi në takim? Telefono një Bricjap dhe do të të ndihmojë të gjesh zgjidhjen.
Të kesh një Bricjap në rrethin tënd të ngushtë është si të kesh një terapist ose trajner në dispozicion 24/7. Ai do të të përgjigjet në mes të natës, do të të kontrollojnë si je dhe do të të rrisë vetëbesimin kur ndihesh keq.
