Mark Zuckerberg, themeluesi i rrjetit Facebook, deklaroi në një intervistë për BBC se fakti që një pjesë e mirë e botës po shkon kundër globalizimit është një problem shqetësues, i cili kërkon vëmendje të veçantë. 

Ai pohoi se kohët e fundit njerëzit nuk po përfshihen në rritjen globale, duke u shkëputur sa më shumë nga bota reale dhe lidhjet e saj. Në një thirrje për veprim, vetë Zuckerberg deklaroi se të gjithë ne, nuk mund thjesht të trishtohemi duke mos bërë asgjë për këtë, por të veprojmë në ndërtimin e infrastrukturave sociale.

“Kur fillova projektin e Facebook-ut, misioni i lidhjes së botës nuk ishte kontroversial. Vit pas viti, njerëzit nga e gjithe bota po lidheshin me njeri-tjetrin dhe mendova se ky ishte drejtimi i duhur që duhet të merrnin gjërat, ndërsa tani vizioni im po bëhet dyshues ditë pas dite”,- u shpreh ai për BBC-në.

Zuckerberg prani edhe se lajmet e pavërteta, pamjet e polarizuara dhe filtrat, po kërcënojnë kështu mirëkuptimin e përbashkët. Krijimi i një komuniteti global, ku të hapen mundësi për çdo njeri dhe jo vetëm për disa prej nesh, është manifestimi që ai po bën nëpërmjet Facebook-ut, rindërtimin e globalizimit funksional.

Sigurisht për këtë, ai u bën thirrje të gjithë llojeve të institucioneve, qeveritare ose jo, të marrin pjesë në ndërtimin e lidhjeve njerëzore, t'u japin fuqi njerëzve ta bëjnë botën më të mirë.

“Është shumë e rëndësishme të jemi qytetarë bashkëpunues.", theksoi ai dhe theksoi faktin se po përpiqet t'u japë shembullin e tij të gjithë sipërmarrësve të tjerë.